放眼溫布萊

chan200308

曼城今周取得1勝1負成績，球隊係時候放眼周末溫布萊既英聯盃決賽。

歐洲賽戰火重燃，曼城主場對巴塞隆拿嘅歐聯16強首回合冇大家預期咁飛沙劈石，反而係巴塞有爭議之下以兩球淨勝曼城。無論美斯個球12碼係啱定錯都好，一如筆者所料曼城始終各方面都唔夠「地上最強」嚟，次回合到訪魯營幾乎冇得博之下，出咗局反而會係對曼城好。

事實上，曼城近期多線作戰之下開始有啲疲態，啱岩周末對史篤城嘅賽事一直久攻不下，最終要靠中場大將耶耶托尼（Yaya Toure）建功先至小勝1:0。至於迪斯高嘅空門炒飛機，又真係唔好提啦……

聯賽上繼續同倫敦雙雄你追我趕，今個周末曼城有場更加重要嘅賽事晌倫敦舉行，就係晌溫布萊球場嘅英格蘭聯賽盃決賽對新特蘭。話就話係盃仔一個，但始終季中有冠軍落袋，將會對球隊嘅士氣有好大提升嘅作用，相信如果贏到冠軍會令曼城爭取英超相當有利。

汲取咗上年足總盃爆冷輸俾韋根嘅教訓，筆者認為曼城唔會再重蹈覆轍，呢個冠軍真係志在必得。再加埋阿古路復出同新特蘭去倫敦成績一向麻麻嘅兩大有利因素支持下，期待曼城可以周末先拔頭籌拎個盃返嚟。