華麗背後

chan200308

曼城作客只能夠同諾域治互交白卷，球隊要爭冠必須識贏得醜陋。

曼城今季一直以強勁既入球能力見稱，領隊柏歷堅尼（Manuel Pellegrini）更加為球隊注入左西班牙式既短傳入滲既打法，以大半季嚟講絕對稱得上係華麗足球。

不過華麗背後，曼城仍然欠缺一個爭冠既元素，就係要識得贏得醜陋。過去曼聯晌費格遜領軍嘅時代，省中人改變方向、亂衝亂撞爭取入球（姑且不談4424）等等，靠嘅係亂咁嚟壓住對手去爭取勝利，係就係唔好睇，但總算係有收鑊。以往摩連奴領軍嘅車路士都係一樣，話之你1:0死守到尾，總之係3分已袋、理鬼得你。

講到今周作客同諾域治互交白卷，曼城就係贏到個勢，但總係冇辦法作出致命既一擊，睇嚟領隊柏歷堅尼真係要放棄上半季場場狂攻大炒嘅諗法，要好好諗下點樣破密集。冠軍永遠都係識贏得醜陋，以及晌踢得唔好嘅情況之下鎖定3分，呢樣嘢曼城真係要學學。

今個星期對於爭標形勢都有關鍵影響，車路士主場大勝紐卡素似乎係踩行油去馬，阿仙奴被利物浦數完之後士氣應該有多少回落，今季英超餘下睇怕都係曼城同車路士「雙藍」之爭。曼城餘下賽事比車路士難打，再冇太多失分嘅空間，放棄華麗轉投實際先至係王道。