子珊喊足6粒鐘

王腳立

台慶視后熱門徐子珊與楊怡鬥得難分難解，二人昨日齊出席活動吸金時，雙方粉絲實行「你嗌子珊我叫怡」壁壘分明舉牌鬥嗌，拍通宵喊戲兼抱恙冇表情的子珊，與楊怡「交足戲」互相預祝封后時，更忍不住流鼻水，認真尷尬！

無綫今年台慶頒獎禮破格搞民選視帝后及最佳劇集，全港逾七百萬人一人一票，多位熱門分子連日來出動拉票，其中徐子珊與楊怡爭視后戰況尤為激烈。據知兩位準視后私下並不稔熟，繼日前楊怡率先於馬來西亞Astro頒獎禮奪視后，而兩女沒有合照後，有指子珊前日缺席台慶宣傳活動亦是為避見楊怡。但為了吸金，昨日二人終再聚首孖住出席尖沙咀的TITONI瑞士梅花表專門店剪綵活動，分別輕鬆將六位數酬金袋袋平安。

子珊與楊怡駕到，兩派粉絲一早帶備字牌到場吶喊支持，擠滿店外行人路，有人更被逼出馬路，出現人車爭路情況，險象環生。高呼子珊及楊怡的吶喊聲此起彼落，每當一方高呼偶像名字時，另一方則扯高嗓子還擊，令現場充滿陣陣火藥味。

雖然粉絲各不相讓，但楊怡與子珊人前仍狀甚友好互笠高帽，果然好戲。患感冒的子珊變病貓聲沙沙流鼻水，至令全程無甚表情，而楊怡則面爆壓力瘡，看似跌Watt，但每當「埋位」時二人亦立即上身，攬腰擺甫士，為對方挑選名錶時，更笑騎騎預祝對方稱后。

對於雙方粉絲阻街及有火藥味，子珊說：「等我一陣去安撫番啲街坊，同佢哋講對唔住，粉絲太熱情，佢哋大聲啲都係想偶像聽到。」談到前日缺席無綫活動疑似避楊怡風頭，子珊即否認：「如果公司要我出席，我病都嚟啦！但係公司好體諒，畀我去睇醫生，尋晚拍賀歲片又通宵冇瞓，仲要喊咗六個鐘，冇瞓加感冒，所以把聲好難聽。」她指視后形勢平均，笑言要用絕招拉票：「可能派護膚品、衫嘅禮券拉票。」對於有指楊怡半價接Job抗衡她？子珊說：「唔信！呢個時候有Noise加價啦！大家身價幾多就真係唔知。」

孖住接Job價更高

而楊怡則維護地強調雙方粉絲沒有阻街：「冇阻街，佢哋支持我哋啫！都驚佢哋有危險，叫佢哋企埋啲。」她直認今次與子珊拍檔剪綵價錢比平時高，風騷的她又笑言有高價，不介意與緋聞男友羅仲謙於聖誕節以情侶檔搵銀。至於持續爆瘡，她表示因內分泌失調，加上早前在馬來西亞吃得太多熱氣食物所至。

兩個樣
子珊（左）抱恙亮相木無表情，瘡瘡面的楊怡則繼續風騷。
牌陣
粉絲舉牌撐偶像，楊怡黨企滿前排，牌陣較子珊黨略勝。
笑喇！
因病而全程呆呆哋冇表情的子珊，因流鼻水而轉身抹鼻，尷尬一笑。

攬腰戲
楊怡與子珊雖然不算Friend底，但搵錢至上攬腰任影。