令你充滿能量的呼吸大法！

藍月亮

呼吸係最自然不過嘅事，人類要生存，就要呼吸，一名法國運動醫學專家就曾經話過，呼吸同情感係息息相關，可見呼吸對我哋有幾重要！有見及此，CG!為你準備咗3個「呼吸大法」，等你可以即時recharge！
＊起床後精力充沛！
1.舒展四肢，手臂自然垂低，抬頭挺胸深呼吸。
2.背部微曲，低頭向胸，緩緩地呼氣。
3.均速重複呢組動作10次，感受身體得到充分呼吸嘅感覺！
好處：呢個「呼吸大法」可以充分喚醒神經系統，改善血液循環，令肌肉得到放鬆，並為大腦一整天的活動提供充足氧氣。你亦可於臨瞓前做，從而令自己心境平靜啲。記得一定要非常慢地呼吸，盡可能延長呼吸的頻率，令身心處於最平靜的狀態！
＊工作期間醒一醒神
1.在5秒內吸氣4-5次。
2.然後吸氣hold住5秒，再緩緩吐氣10秒。
好處：呢個「呼吸大法」特別啱缺乏休息嘅上班一族，因為hold住呼吸嘅動作可以令你停低手頭上嘅工作同複雜思緒。基本上，重複做呢個練習3次已經有明顯嘅紓緩作用！
＊瞬間減壓
1.慢慢地深呼吸，呼氣後稍作停頓。
2.平穩地呼吸10-15秒後，將注意力集中到心臟，幻想佢均速並有力地跳動，吸入的空氣會帶來清新的氧氣，呼出的氣則可掃走體內的「垃圾」。
3.同時，試試感受胸口的熱量，閉上雙眼冥想一下，例如：愛人的臉容、綠油油的田園風光……讓自己處於美好的情感之中。
好處：你嘅心跳同呼吸是一致的。大腦情感跟心臟的狀態會互相傳遞信息，俾你「一切都很好」的心理暗示。呢個「呼吸大法」可以喺一天內的任何時間進行，尤其當你面對高壓或感到焦躁時，可以即時紓緩緊張狀態！