金牌味皇

綿羊

小涓

家鄕梅子炆鴨酸甜醒胃正合時令 用冬瓜盅做火鍋大受食客歡迎 金瓜東坡肉好睇又好食 帶子釀金錢蟹盒有新意有睇頭

金牌味皇     應時新菜益食家     新春過後，春夏季節交替，金牌味皇大廚精心硏製了幾道時令新菜，一來為食客帶來新鮮感，二來因應開業一周年，實行優惠大放送酬謝食家。     梅雨季節來臨，一道梅子炆鴨酸甜醒胃正合時。大廚以鹹梅肉配搭酸甜梅醬調製梅子汁，肉鴨先醃入味後再用滾油淥鴨，皮脆肉滑，多汁醒胃。     帶子釀金錢蟹盒是以傳統金錢盒釀入新鮮帶子肉，帶出鮮帶子新食法，款客自用都大方得體。金瓜東坡肉好睇又好食，大廚改好大件靚花腩，用靚陳醋加精選藥材調汁炆腩件，這道菜要預早兩日做至入味，上檯時香味四溢，入口濃香鬆化。     金牌味皇去冬推出冬瓜盅火鍋，一個瓜盅食到底，清爽去熱氣，口碑不俗。新春過後，大量海鮮天天運到，保證火鍋用料新鮮，品種選擇多。     為酬謝開業一年來街坊熟客幫襯，推出堂食惠顧每檯免費送石岐乳鴿一隻，十點後更可享黑牌威士忌每枝三百五十元（包梳打水）的優惠。味皇營業至凌晨四點，係食火鍋歎宵夜的好去處。