不能在男友面前說的話

藍月亮

不能在男友面前說的話
哈哈




女人的終極幸福，相信包括了一個忠誠可靠，體貼仲孝順自己父母的好男人。感情愈是穩定，雙方愈是放心的表達真我。可是，當以為跟你信任的他可以無所不談，卻不知道可能有些說話已挑戰了他的底線。想跟情人保持親密，以下男人最討厭聽到女人講的話，還是留在姊妹淘才講個夠吧！
1. 「我個Ex都會卅唔會咁嘅！」
很多女人會不自覺將現任男友跟前度作比較，有時甚至會衝口而出跟現任男友「分享」回憶。無論提及嘅係優點定缺點，就算你喺男友面前狂踩前度，佢可能都會誤會你對前度餘情未了，甚至因愛成恨。男人討厭被人拿來比較，尤其係被比下去。縱使你以為係雞毛蒜皮小事，前度可能真係肚腩較細、頭髮較濃……呢啲說話萬萬不能傳入男友耳中。
2. 「阿妹畀人搞大咗，唔好畀我阿媽知呀！」
如果真係秘密，就讓它成為秘密吧！就算你信得過男友唔會亂爆大鑊，就算佢有興趣八卦，但其實心地裡都唔想惹禍上身，所以最好都係將你親朋戚友嘅秘密放入夾萬。再講，佢已經知道你嘅秘密夠多了，平時幫手解決你嘅煩惱已經夠累，所以A小姐有咗，B小姐子宮生瘤等秘密，都係同他少講為妙。

3. 「將來我哋結咗婚卅有小朋友的話，就會……」
難得搵到個好男人，幻想一吓大家嘅將來都係人之常情，但太早同佢分享你嘅理想藍圖，實在有點兒趕客。即使佢已經認定你係結婚對象，討論未來大計多少會令佢感到有壓力。如果佢主動同你計劃將來，你當然可以同佢交換意見，但切忌滔滔不絕，就連你想小朋友讀邊間學校都話畀佢知，那未免太過扯喇！
4. 「呢個女仔靚唔靚呀？」
就算再蠢嘅男人，都知呢個問題根本唔係問題，係一個陷阱，點答都死。如果答「靚」，佢知道你定必妒忌兼會唔高興，仲引申「咁我靚啲定佢靚啲？」、「佢咁索，不如你搵佢做女朋友囉！」等接二連三嘅攻擊，令佢招架不住之餘，亦會令原本和平氣氛瞬間變僵，何必呢？縱使你表明態度，純粹想知佢嘅審美眼光係點，放心，你男友一定唔信你咁簡單！

5. 「我唔鍾意你阿媽！」
佛洛伊德話天下男子個個都有戀母情意。一不小心透露了你對男友阿媽的反感，定必令你喺佢心目中打個八折，甚至會Game Over。如果你真心愛佢，應該包容所有佢關心嘅人，無論係父母、兄妹、朋友，甚至隻貓隻狗，盡最大努力行駛你嘅Social Skill吧！贏得佢親朋戚友嘅歡心，對你有百利而無一害，Touch Wood將來有乜爭吵都有人暗中撐你！

6. 「我唔鍾意我塊豬腩肉。」
當幸福女人談戀愛時，由於經常陪男友出外吃喝玩樂，少咗私人時間去做運動keep fit，肥十磅八磅實在常見。你身體最嚴厲嘅評審，往往只有你自己；只有自己先知多咗邊啲鬼祟肉，可能佢根本察覺唔到──直至你話畀佢聽。更重要係，你批評自己時會不自覺地流露出不安，令佢覺得你失去自信；大部份男人討厭冇自信嘅女人，多過自信可人兒身上嘅豬腩肉。又何況，若佢覺得你冇吸引力，當初就唔會同佢一齊，而你嘅吸引力又豈會侷限於身材呢？

7. 「你真係冇事呀?」
男人甚少喺自己心愛嘅女人面前示弱。若畀你發現到佢為某些事而憂心失落，你可能會在不知所措下表現過份緊張，原本溫柔慰問幾句已足夠安撫他，最終卻引發連串擾人的盤問，答咗你冇事竟加多句「你真係冇事呀？」來Double Confirm，只會使他煩上加煩。遇上此情形，作為好情人應該畀佢多啲私人空間，別嘗試去打爛沙盤問到篤，問佢為乜煩惱，佢嘅答案可能就係：「你囉！」
8. 「我放咗屁呀！」
除非對方有癖好，否則大部份男人冇個想知有關你屎尿屁嘅事。有你親口證實，佢就再冇藉口老屈屋企隻狗，然後腦袋馬上啟動聯想功能，把你與「不性感」掛勾，瞬間視你為麻甩佬的一份子，往後你作出任何較男性化嘅舉動，諸如睇波隊啤，佢好難再會視之為豪爽迷人。男人心目中，只有王晶先玩得起屎尿屁，即使你扮可愛高八度同佢講「我放咗屁屁啊！」好難相信佢會因此而更加愛你。