成為男友與他媽媽的磨心，點算？

藍月亮

唔知大家有無試過，男友同佢媽媽嗌交，自己慘被夾喺中間，成為兩者中間嘅磨心呢？本來唔關自己事，突然間又變成關自己事，仲要去「處理」呢？
當男友同佢媽媽嗌交，尤其係男友個性比較硬頸的話，情況會更僵。佢哋通常會處於冷戰，男友可能會好嬲，唔同auntie講嘢，而auntie可能會因此而打電話俾你，同你講一大堆說話。佢哋兩個不停要你傳話，夾喺中間嘅你，既要尊重auntie，又唔可以令男友覺得你唔supportive，咁到底應該要點做呢？
無論件事係邊個錯都好，都要以一個客觀嘅角度去分析事件。
面對男友媽媽：
當發生呢啲事，好可能男友媽媽都會打俾你，同你講一段說話，當中仲好可能暗示卅明示叫你去勸男友，借你把口令男友屈服卅認錯。
男友媽媽係長輩，理論上點都要尊重佢。同佢對話時，你亦要有禮貌回應，並且表示你會同男友傾吓，但男友點諗自己控制唔到。咁樣可以令auntie覺得你有心幫忙勸交，但又唔會強迫男友，變成auntie想要的結果。
面對男友：
同男友客觀地傾吓問題所在，唔好用勸交嘅形式去傾。應該冷靜地分析成件事，當中係咪有啲咩誤會？例如你可以話：「我都明白auntie咁樣唔係幾好，但你咁樣發佢脾氣都唔係咁好喎。」喺對話當中，應該表現到支持男友，令佢感受到你係企喺佢嗰邊，而唔係一味幫auntie講好說話，否則男友可能會嬲埋你！最後男友想點都好，應該交返俾男友自己決定。CG! Reminds U：
•有啲類型嘅男友媽媽見你幫口同佢個仔講係work的話，可能以後有咩事都會「諮詢」你，要你出招勸掂你男友，所以你一定要小心處理，喺雙方之間拎返個平衡。
•除非係啲好嚴重嘅事，否則兩母子通常過一排就會自動無事，慢慢同返對方講嘢。不妨得閒去男友屋企食飯，又或者拉埋男友約auntie出嚟飲茶，佢哋好快就和解架喇！
•同男友或男友媽媽傾談時，唔好作出批評或人身攻擊，以為咁樣就可以取得對方信任或認同，其實咁樣只會破壞自己形象，影響你喺男友同佢媽媽心目中的形象。