輪姦子珊1秒咁多觀眾鬧爆

王腳立

甚得網友歡心的徐子珊在無綫劇集《雷霆掃毒》中搏到盡，一場事先張揚的輪姦戲成為宣傳重點，該場戲前晚以一秒光速完事，一眾網友失望到爆，在網上狂鬧無綫拍得「求其」，戲言觀眾比子珊更慘情！而子珊則笑言感激網友「寵幸」，希望各界集中欣賞其心理上的演繹！
無綫花旦徐子珊在新劇《雷霆掃毒》中既吸毒又被姦，演出搏到盡被捧為視后熱門，該場輪姦戲前晚終於播出，雖然早已預料有尺度限制，但網友依然等睇！結果希望愈大失望愈大，子珊被李家鼎迷暈打毒針後，鏡頭影着四名笑騎騎的大漢，沒有剝衫沒有動作，以意識流方式交代劇情，「重點」場口只得一秒，令不少期待了22集的網友拍枱大鬧，直斥無綫「商業詐騙」及要求「回水」，不滿劇集「捉到鹿唔識脫角」，浪費大有發揮空間的場口，更有網友將此幕與電影《3D肉蒲團》「露點變老點」相提並論，並指四男每人竟只分得0.25秒，令人難以接受！通訊事務管理局收到三宗投訴，不滿該場戲被Cut。不過，有網友讚子珊喊得出色，演技大躍進，視后在望。
自嘲除衫唔好睇
身在上海的子珊接受電話訪問時笑言多謝大家關注該場戲，認為秒數不是重點，希望大家留意其心理上的演出：「大家唔好嬲啦！主要想講我之後面對愛人嘅痛苦同毒品禍害，我哋拍嗰時盡晒力照導演要求做，剪接到咁，係想有幻想空間，所以點到即止，其實我除衫唔係咁好睇o架咋！」另外，她昨日參與上海賽車，在女將中以最快圈速完成，練習賽名列第一，而錢嘉樂是男將中的第一名。當子珊得悉有網友讚其演技，笑言要「再揸快啲」！
受電視尺度規限
至於監製林志華解釋電視劇尺度有限制，不希望令觀眾帶來不安，但強調沒有刪剪鏡頭。對於網友期望有「惹火」場面，他說：「大家諗多咗，之前講過呢場戲唔會有過程！（網友嗌回水？）咁我拍多啲好劇補償囉！」問到陳法拉也曾在劇中露Bra，他表示這是生活情節，不會令人不安。
影視組



徐子珊在上海賽車，成為女將中練習賽第一名。