搵邊個星座訴苦好？

王腳立

人生不如意事十常八九，如果唔開心想搵個朋友傾下，搵邊個星座會好Ｄ呢？ 身同感受型∼巨蟹座　雙魚座 　　如果你覺得自己需要一個身同感受咁去關心你的人，你覺得呢一刻好需要得到人的同憐，就最好搵巨蟹座同雙魚座的朋友訴苦。佢兩個會好認真咁去分擔你的煩惱，會覺得你好慘好慘，隨時聽完可能喊得仲有聲過你添！巨蟹座會用佢天生的母愛來關懷你，而雙魚座呢，佢就會用佢ｄ悲天憫人心腸來登你難過。佢呢款身同感受的傾訴對象就最適合用於純粹想搵人認同兼可憐你的朋友，但係如果你想搵人畀意見，就千祈咪搵呢兩個星座，盞你越傾越心煩！ 齋聽冇意見型∼山羊座　水瓶座 　　如果你想搵個人出來聽你訴苦，仲要係只管聽不要問不要畀意見，對啦！記得搵呢山羊座同水瓶座呢兩個星座喎！首先既然你call得佢出來訴苦，身為你朋友佢絕對唔會拒絕，佢會好安靜咁聽你講，見你喊到流晒眼淚鼻涕，佢會好識做咁為你遞上紙巾，對於你的提問同申訴佢會用「嗯！嗯！」作回應，亦都唔會借題發揮入位講自己ｄ野，基本上同個會發聲的毛公仔冇乜分別，不過如果你需要一ｄ有血有肉的安慰說話，呢兩位老友就唔係咁適合囉！ 熱熾燃燒型∼白羊座　獅子座 　　如果你覺得屈住啖氣好辛苦，你要搵個人陪你響山崖對住個大海大叫，搵佢兩個啦！白羊座同獅子座！佢兩個係果種同一個鼻窿出氣兼且火滾過你的聆聽者，你數１樣不是，佢會和應你之餘再加上３倍例子！你鬧到火紅火綠，佢直頭鬧到青筋現埋添！佢唔會過問你有冇唔好的地方，只會一鼓作氣咁同你發洩你的不滿，同佢個一齊會令你度氣好快消失，當然純屬發洩同得啖笑，完全冇乜效益，如果需要一ｄ認真意見的話，就千祈咪搵佢兩個啦！ 冷嘲熱諷型∼處女座　天蠍座 　　如果你份人犯賤又或者你覺得自己需要畀人踐扁再企返起身，搵處女座同天蠍座兩個啦！佢兩個唔係冇同情心，只係佢兩個較為鍾意發掘人唔正確的一面，所以就算你喊得幾慘同佢訴苦，佢會傾向指責你唔著的地方，簡直係雪上加霜。處女座會指住你話你唔好，佢會講到連你自己都覺得自己抵死；至於天蠍座雖然佢唔會好似處女座咁直斥其非，不過佢會用ｄ不屑眼神望住你，攪到你好無癮…所以一旦你係心血少ｄ把持力少ｄ都千祈咪搵佢兩個呀！ 辣手判官型∼人馬座　天秤座 　　如果你為人中肯，你需要搵個旁觀者用冷靜的態度去分析下件事，搵佢兩個啦，人馬座同天秤座！佢兩個不嬲出晒名為人中肯，人馬座最講道理，佢會認真從「對與錯」的角度去分析到底係邊個唔著；至於天秤座為人較為鍾意從兩方面出發睇事物，佢唔會因為係你講而偏坦你，所以呢兩位老友最適合作為一ｄ冷靜的人的訴苦對象，相反，如果你純粹想搵個人訴下苦發洩一下就千祈咪搵佢兩個，唔係佢兩個你一句我一句係咁話你唔著你都咪話冇癮呀！ 轉你話題型∼雙子座　金牛座 　　如果你較為鍾意玩逃避現實，唔開心的事唔想再多提，你就一定要搵雙子座同金牛座傾下！講到訴苦佢兩個唔係唔想聽，不過又真係唔多會認真去聽，雙子座會當係趣聞咁聽，聽到悶佢會好巧妙咁轉話題；金牛座仲勁，佢一邊聽你講一邊會覺得呢ｄ係人生小考驗，覺得自己仲慘啦！講下自己ｄ經驗，講下ｄ朋友ｄ經驗，講下講下扯到無雷公遠。所以想盡快忘記不快的人記得搵佢兩個，但係想搵人傾訴下訴下苦的就咪搵佢兩個！