年關近牛肉猛加價

綿羊

年關近牛肉猛加價 周中

熱熱鬧鬧又到新一年，雖然照我哋中國人傳統未到春節就冇乜“年味”，不過喺呢度都要同各位問候聲新年好，希望新一年大家身體健康，事事順利，食好瞓好！不過臨近春節，眞係要食得好荷包口就冇得收太緊喇。家陣樣樣嘢都加價，其中牛肉加價勢頭最猛，短短幾個星期一斤鮮牛肉就去到成百幾蚊；又撞正最興打邊爐嘅時候，個個為咗食新鮮肥牛都要左撲右撲，你話係咪好誇張？     港澳冇牛房，想食牛肉就要靠商戶一批批入貨。一到冬天牛肉變搶手貨價格就容易炒高，道理其實同炒iPhone呢啲電子產品差唔多。不過電子產品就話可以唔用iPhone，但食肉就眞係唔少得牛肉，尤其對於一班無牛不歡嘅“牛魔王”來講，眞係有苦難言。有幾位為食老饕就直情話，本地肥牛貴到飛起，不如補多幾十文整件美國牛扒返來煎好過。講眞老周我就唔係非牛肉不食，但係冬天打邊爐冇咗肥牛眞係好失色。     其實現時都有啲網上商舖開賣牛肉，百零出頭就可以買到又靚又正嘅外國牛扒，甚至連生猛海鮮都有得網上買，價錢都好實惠，食得過，不過當然要幫襯信譽好的舖頭啦！但係講返轉頭，逢年過節想食得平又食得好，就算搞得掂食材都仲要解決煮食問題，起碼要識得開隻生蠔、煎件靚扒先至得嘛！