12星座面對另一半落難的反應

lwl2007

★白羊座★
白羊座不分男女都係非常大男人、大女人，而且睇自己個面子大到成個月球咁大，所以萬一佢另一半落難，佢一定會出盡全力幫佢擺平，如果唔係佢另一半畀人數臭，佢一樣覺得咁冇面，所以點都會陪你死撐落去。



★金牛座★
金牛座係d好鬼傳統的人，佢對另一半的睇法都係咁，大家一旦走埋一齊，就算對方發生咩事，佢絕對唔會離棄對方，就係正所謂的嫁雞隨雞，嫁狗隨嫁狗，不過難免佢會成日係你身邊呻到你煩爆！



★雙子座★
雙子座份人係有一點冷淡，對住另一半都唔例外，如果一旦你落難身陷險境，你咪怪雙子座冷漠無情，佢唔係唔想幫你，不過響佢個字典入面會認為「我幫得你幾多次」，久而久之佢會索性消失埋！係各自飛的高危份子！



★巨蟹座★
講到巨蟹座就要睇吓你兩個嘅關係去到邊，如果停留響男女朋友的層面，係盡可能兼有能力的範圍底下，佢都會希望可以幫到你，不過始終唔係一家人，佢會留有低線；不過一旦成為佢老公或者老婆，佢就會盡心盡力為頭家著想。



★獅子座★
講到呢位面子大王，另一半落難佢當然會出盡全力幫你，你有事咪即係等於佢有事，抱住呢個英雄主義佢點唔會出手呀！但係∼咪開心得咁早住，佢將你由地獄救返出來之後，佢一係提你一世佢幫過你，一係就嫌棄飛掉你！



★處女座★
唔好意思，講到精打細算，處女座認第二冇人咁認第一，如果另一半落難，佢又唔會話衰到第一時間選擇離開你，但係你自己冇解決的方案而令佢面臨危機，咁就唔好怪佢執行李帶埋ｄ私己錢走佬喎！



★天秤座★
平日冇乜主見的天秤座響呢個時候真係心都亂晒，佢係真心唔知應該點樣處理，所以基本上佢係唔會識得有乜係應該做同唔應該做，大概都會係死撐同埋繼續留響佢另一半身邊，衰ｄ講句就係攬埋一齊死！



★天蠍座★
如果你另一半係天蠍座就恭喜晒你！要講到最用力撐另一半的就非天蠍座莫屬，你咪睇佢平日陰陰濕濕咁，其實佢好鬼重視另一半，所以無論你發生咩事，憑住佢嘅戰鬥力，要幫你解困當然冇難度啦！



★人馬座★
首先，人馬座係講道義嘅星座，另一半有難，響佢心裡面當然認為唔可以大難臨頭各自飛啦！表面上佢會好似好有義氣陪你，不過響佢內心又唔係咁甘心陪你捱喎！所以你一係先下手為強要佢支持你，一係你就放佢走啦！



★山羊座★
你千祈咪傻到會憧憬同呢個星座會有患難見真情的畫面，一旦對佢冇晒利用價值不特止，仲要佢關照返你轉頭，唔好意思，佢會狠狠咁一腳踢開你，如果你係抵死，佢仲會加ｄ冷嘲熱諷添！好鬼現實同冷血！



★水瓶座★
為人理智但係非常負責任的水瓶座，基本上佢會響佢能力範圍低下盡力幫你，仲唔會多多聲氣，直頭係施恩莫望報嗰隻，但係！恩只會有一次機會，如果佢見到你一錯再錯，對唔住佢唔會再睬你！



★雙魚座★
基本上雙魚座係唔會離開你，不過佢唔係出於義氣，而係覺得比起離開你要佢一個人出去捱世界就更加艱難，佢總係會認為你一定有辦法攪得妥，講得好聽ｄ，佢會對你不離不棄，講得現實ｄ係就算你落難都仲要咩住呢個大包袱！