DaDa：我要公平啲

王腳立

女人好易呃？這句說話形容新一代性感女神陳靜（DaDa）也許非常貼切，19歲談第二場戀愛並獻上第一次，卻換來男友不忠！雖然情場上經歷6次失敗，她仍無懼結識異性，結果仍是被人利用，看來異性就是其剋星！她會一連5日分享感情、家人及事業等經歷。
愛情上，我好自我，係一個野蠻女友！媽咪想我早結婚，因為佢都好早結，不過我想拍拖多過結婚，因為屋企嘅關係，加上見到好多朋友離離合合，就算呢一刻幾好，之後都會變！我拍過差唔多6次拖，都係入行之前，每次都係我主動嗌分手，入行之後真係冇拍過拖，會同男仔出街，不過未遇到一個完全明白我嘅男仔！
初夜後被背叛
初戀喺17歲發生，雖然有帶過男友返屋企，不過只係拖吓手仔。19歲認識第二個男友，佢大我幾年，由女朋友A介紹。初時覺得佢好斯文、好有風度，所以走埋一齊。記得拍拖3個月紀念日，佢煮燭光晚餐又送花，真係好冧，大家飲咗啲酒，就發生咗親密關係……不過佢之後不忠！有一次佢個電話彈出個訊息，當時估到唔妥，佢同A好曖昧！有一次男友話要開會陪唔到我，但我好想見佢，於是凌晨走去佢屋企，點知畀我見到A喺屋苑出現，結果估中咗佢上男友屋企！真係接受唔到！畀人呃我好唔開心，我冇即場踢爆就喊住走，過咗一日就分手！

愛情上出現過第三者，令我敏感咗！第3個男友識咗第二個女仔，女人嘅第六感好準，我有Check佢電話，亦係我拍拖咁耐唯一一次Check，自此都冇咁做，因為「有發現」係件好殘酷嘅事，情願當時唔知！可能因為男友出軌，我要公平啲，所以我都一腳踏兩船，出去識男仔平衡心理，你專一我會好專一，但你唔係，我都唔會係！我鍾意咗新識嗰個（男仔），就同男友分手同佢一齊，不過最後都係性格不合而分開！第5同第6段感情就係Gary同王宗堯，兩個都拍咗1年拖，發覺做朋友好過做情人，王宗堯好似我哥哥，分咗手仲係朋友！

入行後冇時間諗愛情！雖然經常畀人影到同邊個一齊或者傳被照顧，好多新聞都係娛樂，做呢行係要包埋，所以我會樂觀面對，屋企人都信我！不過我覺得有啲新聞都幾過分，早前同男性朋友出街就被講到係男朋友，我唔介意畀人影我嘅私人生活，有曝光係好事，不過我怕影響朋友！影到第二個又話係我男朋友、又送樓畀我住，真係好過分，抹煞咗我嘅努力！
慘遭男星出賣
呢行係會有男人利用你，我都試過！我好易相信人，以為交個心出嚟做朋友，人哋都會咁對我，但原來唔係囉！試過同一個圈中男仔成日被影到一齊，第一次影到就算，第二次會覺得有冇咁巧合？我都有直接問佢係咪利用我，佢都認咗，佢覺得係健康宣傳！我覺得可以同我講番聲，佢利用我嘅信任，依家我唔會當佢係朋友！最初同佢出街係有好感，不過好多事發生得太快，令我睇清楚，我唔鍾意畀人利用宣傳！我係靠性感宣傳，不過冇靠其他人！可能太多緋聞，依家好難識到男友，上年年底有一個對象，可惜因為呢啲新聞影響而冇咗，所以都覺得空虛，惟有專注事業，希望將來會更好！（明日待續）
Profile
姓名：陳靜（DaDa）

體重：49kg

三圍：33D、24、34

身高：1米67

出生日期：1989年3月22日

電影作品：喜愛夜蒲、低俗喜劇

口述：陳靜　

筆錄：專案組

陳靜有樣有身材，可惜捉不住情人的心，滿身傷痕。

DaDa為報復男友不忠，索性「禮尚往來」！

DaDa將心奉上，沒想過被騙收場！