呢隻紅魔太陌生

chan200308

韋碧克喺曼聯嘅時候，好少做主角，吊詭之處係佢一過檔阿仙奴，就惹來好大反應，突然間好似變成另一個人，霎時間變得好陌生……。 撰文：飛燕

朗尼、尹佩斯、桑馬達加埋新兵迪馬利亞4個頂級攻擊球員齊上陣，「擺大個頭」未見效果，反而防線唔穩陣就係鐵一般嘅事實……，相信呢個係好多人睇完曼聯悶和般尼之後嘅觀戰感覺，不過有一個人可能有另一種體會，佢就係作壁上觀嘅費格遜。喺睇波期間，鏡頭捕捉到費Sir木口木面，原因未必因為隊波踢得差，而係隊波同佢好似這麼近那麼遠，陣法、人腳配搭差天共地，只存感情，不存激情，又係另一種陌生。

當然，如果佢知道連韋碧克都被球會賣埋，會有更深體會，甚至可能會倒抽一口涼氣。

回想費Sir年代，由曼聯過檔到阿仙奴嘅，5隻手指數得晒，印象中名氣最大係施維斯達（當時都過晒氣囉），敵對球會，邊個咁喺太歲面前動土，動費Sir麾下當打球員一根頭髮？

曼聯近代其中一個最引以為傲嘅地方，相信係培養「七小福」在內嘅一眾親生仔，其他球會望塵莫及。韋碧克一走，阿仙奴方面好似執到寶，曼聯呢邊立立亂，試問有幾多人喺呢個時候美言送行？

雲高爾打散咗曼聯多年所建立嘅陣勢、傳統，破舊立新對與錯，將會用戰績釐定；對非曼聯粉絲嚟講，基本上再冇愛惡可言，試問你會隨便戀上，或者痛恨一個陌生人嗎？