涼風起大閘蟹收成大好

綿羊

涼風起大閘蟹收成大好 周 中

涼風起大閘蟹收成大好     涼風漸起，好快又到食大閘蟹嘅時節。之前同班老友一齊過內地“視察”今年大閘蟹嘅收成，形勢一片大好。睇嚟今年等到貼近十一月就到大閘蟹最靚嘅時候，各位大閘蟹“粉絲”到時候有口福。     宜家市面上已經有細隻靚蟹上市，大約四、五両重，差唔多半隻手掌咁大。雖然細隻咗啲，不過蟹肉夠鮮甜，買返嚟過吓癮都無妨。呢個季節買蟹要睇準肚臍尖形嘅雄蟹，膏足肉堅，味道最有保證。過完買蟹呢關，跟住就到烹調喇。大閘蟹最常見嘅做法當然係蒸，細隻蟹差唔多開大火蒸個十分鐘就食得，對廚藝冇乜特別要求。不過記得蒸蟹要避免生蒸，因為容易整斷蟹腳。最好買返嚟就將大閘蟹放入雪櫃冷藏，入鍋之前要洗淨外殼同清除蟹毛上嘅污垢；有條件嘅話去街市買返幾塊大片紫蘇葉墊底一齊蒸，蟹味會更濃。不過大閘蟹好味歸好味，始終都係寒性食物，一次拆個兩三隻過把癮就好喇。食嘅時候可以點啲醋、薑同黃酒，食完之後最後整返杯薑茶嚟暖吓胃。     老周我年年都緊密關注大閘蟹，可以話係大閘蟹嘅“忠實粉絲”！今年同樣落足心機，搵咗幾位正宗上海師傅切磋廚藝，開始籌備打後嘅大閘蟹宴，各位老饕密切留意。