王喜情義無憾：陳生係我屋企人

lwl2007

由陳志雲捲入貪污案開始，王喜對志雲義無反顧力撐到底，陪出庭、幫撐傘、代放生，由始至終展現不離不棄鐵漢「友」情。而早已視對方如一家人的他，甚至甘冒母親反對的可能，亦決讓志雲「見家長」。幸好，今天一切已雨過天青！

上周五，陳志雲涉貪案獲判無罪，王喜喜悅之情更勝當事人！回首陪伴志雲走過這540天官非日子，除了出心出力陪出庭、放生祈福、赤腳拜佛、甚至願冒賣樓冇瓦遮頭之險，亦要全力支持志雲打官司討清白，王喜認為只是盡一個好友的情義：「記得陳生試過有一刻軟弱，話覺得『畀人蝦』，呢句說話出自平時何等堅強、何等高EQ嘅陳生口中，我好難受。（感觸落淚？）我唔會講有冇，但嗰刻覺得要為佢伸張正義。」

落雨擔遮好平常

不止一次被影到幫手撐傘陪志雲上庭，王喜說：「預咗人講三講四，但作為朋友，落雨擔遮好平常，嗰日陳生好早去整頭，佢好貪靚，幾滴雨整亂個頭就唔值，其實好多人都喺背後關心佢，不過唔方便出面，咁就由我做，成件事冇咩值得表揚。」

王喜甘為志雲一再放低自己，蓋因早已將對方升格為「屋企人」，他說：「其實一早當咗陳生係屋企人，但自幼家教好嚴，唔畀隨便認外人做屋企人，嗰次幫陳生放生，阿媽都有去，陳生好早到，我介紹佢畀阿媽識。（見家長？）阿媽當陳生係高層咁看待，全程必恭必敬，場面好好笑。」

承受埋佢嘅過去

外間雖視王喜為「志雲幫」頭號人物，他卻坦言反而因這三字，成了派系鬥爭中的犧牲品：「控制唔到人哋當我係『志雲幫』，但陳生喺工作上冇幫過我，我亦唔想佢幫，佢有佢做總經理，我有我做小演員，但正正係『志雲幫』呢個牌頭，我喺工作上冇被善待過，但做朋友就係咁，你要承受埋對方嘅過去，包括佢有過啲咩恩恩怨怨，都要為佢啃！」

                                                                                                                                          
王喜與志雲相識近廿載，早已將對方視作一家人。


                                                                                                              
回想母親當日見到志雲的情況，王喜忍不住笑。


                                                                                                              
王喜曾因「志雲幫」的牌頭，在工作上不被「善待」。


                                                                                                              
志雲出事期間，王喜不時到其寓所「家訪」，不離不棄，力撐好友。