莊思敏難捨Deep心痛淚流

lwl2007

莊思敏（Jacquelin）與吳浩康拍拖五年，最終分手收場。莊思敏自爆拍拖兩年已發覺性格不合，爭執不斷，但緣盡非因女尊男卑。她雖然決絕分手，但仍難捨五年情，一個人獨處時會不禁流淚。

眾所周知，我同吳浩康（Deep）最近分手。今次分手只因性格不合，並唔涉及第三者。可能大家都會覺得不可思議，竟然拍拖五年，依家先講性格不合。

其實發覺有問題，並非最近嘅事，我哋一齊大約兩年，問題就開始浮現，但當時大家都好努力去遷就同包容對方。不過，始終不斷重複去忍受同包容係一件好辛苦嘅事。尤其相處愈耐，愈發覺性格及生活有距離，處事方式及立場經常產生分歧，好多時都會為好小事鬧交，後來發展到每個月都會吵一次大鑊。

Deep以前經常將分手掛喺口邊，喺我立場，我認為可能佢講得太多，而令兩個人關係造成更多缺口，有時我會諗點解佢可以咁輕易將分手講出口，係咪佢根本唔重視呢份感情？不過，每次鬧交結果係不了了之，問題從來冇真正解決。

之前一直拖落去，係因為大家都唔捨得放棄一段五年嘅感情，好想畀機會對方。直到幾個月前，我哋開始認真討論係咪應該分手，最後發現原來分手先係唯一出口。

到依家呢刻，我依然係唔捨得。心情好反覆，有時會好失落，平時有朋友陪或忙住做嘢！可以乜都唔諗，但當一個人靜落嚟嘅時候，就會好唔開心，有時諗番以前一齊嘅片段，都會忍唔住喊。

止蝕免再浪費

有朋友問，有冇機會同Deep復合？我覺得機會好微，因為分手係深思熟慮嘅結果，並唔係一時衝動，再一齊又代表乜﹖根本搵唔到出口。雖然覺得可惜，但冇辦法，分手固然係浪費咗五年，但再拖落去，只會浪費更多時間。

之前拍拖，經常畀人問幾時結婚。當我發現大家性格不合，就冇諗結婚。Deep比較樂觀，佢會計劃，每次佢講起呢個話題，我就會避開。佢覺得結婚好簡單，唔一定要擺酒，但基於我嘅家庭背景，係一定要擺酒同先買樓，如果我同老公結咗婚仲要租地方住，我父母一定接受唔到，我認為結婚要有經濟基礎，但佢唔係咁諗。只係呢方面，大家已經有好大分歧。

慨嘆男性心急

你可能問係咪男卑女尊而影響呢段感情，我唔認同，因為由一開始拍拖，佢就已經知道我家庭背景，我唔會要求食得好好、着得好好。當然面對外界會有一定壓力，見到啲報道，我會唔開心，有時寫到我養佢咁，其實好唔尊重我哋，我會諗我唔係差到咁，要包養先搵到男友，當然佢都難受，但我哋兩個人知道真實情況係點就得，唔會去理人哋點寫。

經過今次分手，愛情觀唔多唔少都有改變，朋友話你可以好快搵到一段新戀情，但我覺得係更困難，因為再拍拖嘅時候，我會好小心去揀，想先了解對方嘅性格、做人處事、價值觀等等，但依家嘅男仔，邊會咁有耐性同你了解，但我唔想只係有好感就一齊。以前拍拖都係識咗好短時間就開始，之後發現真人同初相識時相差好遠，最後都係分手收場，我唔想再重蹈覆轍。

（明日待續）

PROFILE年　　齡：31歲

身　　高：五呎九吋

三　　圍：34C、24、36

入行經過：身為拿督、中國光大控股前主席莊寶長女的莊思敏，於98年踏入模界，憑其高瘦身形及42吋長腿，曾為不少品牌擔任模特兒。其一對孖生妹妹莊思明及莊思華也曾踏入娛樂圈，莊思明去年當選港姐季軍。最為人津津樂道，是莊思敏於去年八月隆胸，把32A上圍隆至34C，並做了割雙眼皮手術。

口述：莊思敏
                                                                                                                                           
莊思敏雖然認為分手浪費了五年感情，但仍決絕地斬情絲。


                                                                                                              
莊思敏與Deep曾經深愛過，可惜最終分手收場。


                                                                                                              
莊思敏失戀後坦言改變了愛情觀，若再拍拖會小心挑選男友。