陳庭欣中空拋窒岑麗香

王腳立

前港姐陳庭欣昨日出席公開活動時「中門大開」搶鏡，輕易揮低同場的人氣女王岑麗香，炒熱全場氣氛，成為焦點所在。
無綫節目《善心滿載仁愛堂》將於周六晚播放，並於昨午舉行記者會，出席的嘉賓有陳松伶、江若琳及鍾嘉欣等，選美出身的朱晨麗、岑麗香及陳庭欣（Toby）即席擔任模特兒，示範當晚拍賣的數百萬元珠寶。一身鮮紅色Deep V打扮的Toby大騷三、四吋事業線，揮低穿Tube Dress的岑麗香，成功搶鏡，香香大方透露帶備了兩卷膠紙防走光，與Toby「分甘同味」！
笑言趁亂走
當記者大讚Toby性感搶鏡時，她笑說：「多謝公司囉！着嘅時候我都擔心走光，所以打直係咁黐（膠紙）。（幾百萬珠寶喺身喎！）頭先我哋先講笑，話想趁混亂走先，點知畀你哋捉住做訪問。」香香則表示戴上珠寶後，感覺高貴又優雅，將來儲夠錢會考慮買套送給媽媽，不過Toby卻食腦地說：「等如成層樓喎，有錢都買樓先啦！」

同場的陳松伶今次抽空返港，灌錄發燒碟之餘亦不忘行善，她將於活動當晚表演，卻打趣表示臨行前要先向丈夫請假。談到唱片翻唱別人的歌，她解釋因當年其唱片公司陷入清盤糾紛，故很難取得版權。
影視組

貴氣逼人的陳庭欣，風騷大晒驕人身材。

失色不少的岑麗香，依然落力晒身上的名貴珠寶。

雨僑（左起）、梁佑嘉、張秀文、江欣燕及許亦妮為慈善出心出力！

有份擔任模特兒的朱晨麗，亦一身珠光寶氣！


久未在港露面的陳松伶（左），與何傲芝在台上分享行善經驗。