A小姐在酒吧認識了新男友K先生，男方靚仔又有錢，又夠細心體貼，令一眾好友羡慕不已。拍拖耐咗，K先生工作很忙，但還是會抽時間陪A小姐，還會安排浪漫到暈的各樣節目。不過，當A小姐想星期日拍拖，他總是諸多推搪，不是說要OT就是要出trip。當A小姐懷疑K先生有咗第二個，卻赫然在街上碰到一家三口共享天倫樂的他……
以上故事你雖然未必親身經歷過，但身邊朋友可能都遇過類似事件，唔想無辜做咗「小三」，其實有「正室」嘅男人係有蛛絲馬跡可尋，不妨留意以下幾點：
放假即無影
佢約你總揀在平日，放假日永遠話自己好忙，咁好有可能佢假日真係要預留時間俾「正印」甚至仔女。
固定時間地點
佢好留意你嘅日常schedule，而見你嘅日子、甚至地點都係固定的，例如逢星期一喺中環陪你食飯咁，原因可能係佢除咗你之外仲有第二、三、四個女友，要好好分配時間俾佢哋。
脫離social network
佢話自己好少用Facebook，唔肯顯示同你in a relationship，亦唔肯將你哋嘅合照放上網。又或者佢個Facebook好少update，亦好少同朋友交流，可能呢個唔係佢真正嘅account。
留意身外物
男人唔同女人，除非佢好貪靚，否則佢哋好少會shopping。而男人隨身嘅銀包、公事包、領帶都會係喺身邊女人「宣示主權」嘅地盤，如果佢換咗新銀包之類，你問起佢面有難色或者支吾以對，咁就有可疑嘞。如果你送銀包俾佢，但佢點都唔肯用（當然你都要肯定個款唔乞佢憎），就更加要留意。
遠離他的圈子
佢成日話未到時機，一直無將你介紹俾佢嘅朋友，你亦從來無見過佢家人。唔係話一拍拖就要見家長，但如果你哋拍咗拖一段時間，而感情亦穩定，你問過佢幾次，佢依然無意欲分享佢嘅圈子，咁你就要小心。
CG! Reminds U
當然，即使佢符合以上情況，都唔代表佢百分之百腳踏兩船，但肯定係對你唔夠開誠佈公。一段穩定嘅感情係需要兩個人互相坦白，鼓起勇氣同佢講清楚你感到不安嘅地方，俾個機會佢解釋。如果佢依然支吾以對，或者你發現咗自己的確係第三者，咁就要決絕地「斬纜」，你值得搵一個專一又真心愛你嘅人！ | 
