仍確信雲高爾不是莫耶斯

chan200308

「有分，真係唔要？」雲高爾喺上場聯賽和新特蘭後，話1分唔夠，當然，由「0」到「1」係唔同但唔代表好，嗟來之食，唔通你要咩？

點知話口未完，直頭無啖好食，曼聯就喺聯賽盃被英甲球隊大敗。雖則話盃仔，但睇番曼聯個陣其實唔算差得太離譜，輸到咁就係始料不及。恕我小人之心，雲高爾領軍戰績越差，最開心嗰個好明顯係莫耶斯，因為曼聯依家不濟正正係為佢平反。連雲高爾咁猛料嘅教頭都束手無策，話需要時間嘅口徑似足自己，莫帥盡肚冤鬱氣！

咪住，睇真啲，其實雲高爾同莫耶斯仲係好唔同。首先係你發現隊波雖然都係戰績唔好，但之前莫耶斯帶嘅曼聯，死氣沉沉，睇得出冇幾多個球員真心去波，衰啲講係交行貨，係士無鬥志嗰隻。

相反雲高爾執教至今，唔好計季前賽，淨係睇兩場聯賽加1場聯賽盃，球員雖然都唔算好生猛，至少有個心肯去波。睇呢場聯賽盃大敗，輸嘅唔係鬥心，係輸在犯錯，相信呢啲錯係出自壓力。似乎球員承受緊好大壓力，但某程度上係知隊波大改革，係又想爭取表現又怕錯嘅心態作祟。當一隊波球員鬥志未滅，只要有咁上下實力，長遠睇一定有一番作為。

呢個就係我認為雲高爾同莫耶斯領導曼聯之別，過程或者會有短暫相同，但結果就好似行條分岔線，重疊後各行各路。只要有恆心，鬥心，有啲嘢總會爭取到嘅。