【城迷觀戰周記】真係冰淋「城」下有排震

chan200308

只因Ice Bucket Challenge，令冰淋城下呢4個字大紅，我作為曼城躉，最近亦好有呢個feel。

話晒係英超盟主，據我所知，喺香港嘅曼城球迷日漸增多，邊城屬於低調一族，但長情。唔係吹牛，我由上世紀已開始留意曼城，可能係鋤強扶弱心態作祟啦，加埋唔太鍾意曼聯，每次曼市打吡都為呢路藍軍打氣，比較印象深刻嘅球員包括入城時已到暮年嘅80年代英甲神射手基夫阿倫、葛頓同雲祖柏等等，事隔多年，曼城依家已經時時騎住曼聯，形勢唔同但情懷仲係一樣。

至於話冰淋城下，因為曼城首場作客紐卡素表現麻麻。進攻推進差咗可以怪世界盃後遺症，但後防一啲包抄同補位嘅基本功好似差晒，如果紐記把握得好啲，戰果好可能係1:1，阿古路補時入球波見功夫但只係錦上添花，戰果唔算反映實況。正所謂愛之深責之切，我要求嘅係冠軍水平，對紐記呢類戰鬥力極其量屬中游嘅貨色，表現真係似一盤冰水照頭淋。

上一季，曼城首場贏波後，第2場就被卡迪夫城打敗，今季第2場更難打，對住利物浦一定要提升戰鬥力。利記係就係冇咗蘇亞雷斯，但季前表現比我哋好，禮拜一我哋主場都未必有優勢，有排震。既然防線表現麻麻，我覺得值得試用文加拉，冇態冇默契都唔怕，質素搭夠嘛。