HotCha Shine 孖Sing四起

男子組合Shine於07年各有發展暫時「解體」，早前再度「合體獻Sing」，大獲好評；而女子組合HotCha去年因Regen離隊升學，Winkie和Crystal以二人姿態重組，並肩作戰！

近年香港女子組合買少見少，除了人氣組合Twins及已拆夥的Cookies及Freeze外，近年仍在樂壇發展的則有跳舞組合HotCha。5年前Winkie、Crystal和Regen以青春姿態闖樂壇，橫掃新人組合獎項，風頭一時無兩！過了頭兩年的「蜜月期」後，近年HotCha的星途曾有起伏，尤其是去年成員Regen離隊往外地升學，令HotCha變化更大，留下Winkie和Crystal以二人姿態打拚。Winkie說：「依家二人姿態出騷會有啲唔慣，可能大家要跳多兩步同埋唱多兩句，但HotCha精神仍然喺度，亦多謝公司配合我哋呢團火。」Crystal則說：「擔心就梗有，都好緊張出面嘅反應。」

好姊妹都會鬧交

談到由「三變二」，HotCha在形象及歌路上作出調整，Winkie說：「我就男仔頭啲，可以試多啲男仔打扮，Crystal就女仔啲。」Crystal亦說：「依家出騷淡定咗，默契多咗，以前反而冇乜耐性。」既為好拍檔又是好姊妹，問到有否嗌交？Winikie說：「工作上會有，但大家為件事好，若然工作冇乜火花就好大鑊，磨合緊工作模式。」

天佑又南陪住大

Crystal慨嘆經營組合艱難：「之前我哋三個女仔，開支更大，公司肯揼資源幫我哋，更加難得，我哋會好珍惜！」對於曾經歷低潮期，Winkie說：「唔算係慘事，低潮期最緊要堅持，要靠念力，唔好亂諗嘢。雖然Regen離隊升學，但我哋重燃另一團火，係踏入另一個階段。（同佢聯絡？）有呀！有時睇番佢依家啲相，個樣仲少女咗，都戥佢開心。」問到有否留意「師兄」組合Shine早前的演出？HotCha說：「有呀！好欣賞佢哋，佢哋啲歌都陪住我哋長大。」

HotCha緋聞不多，談到擇偶條件，Crystal說：「唔使靚仔，有經歷同懷才不遇嘅感覺更好，唔可以花弗，才華最緊要，從事表演藝術嘅男生，我都會考慮。」而Winkie則說：「以前揀靚仔同大隻，但人成熟咗會睇埋佢個『餡』，睇佢有冇內涵同才華。（抗拒圈中人？）依家唔會！（兩個爭仔？）唔會！大家審美眼光唔同。」

後記：「舞」得喼弗

作為跳舞女子組合，身形絕不能輸蝕，HotCha經常結伴運動喼弗，Winkie還做瑜伽：「做瑜伽要靠念力，愈來愈有效，有線條美。」Crystal則表示較注意飲食，盡量少食多餐，她還表示戒吃牛肉。

今年是Shine出道十周年，徐天佑和黃又南由昔日任性的半熟男，變成今日的穩重型男。自從5年前分開發展各自拍電影後，Shine再沒有同台演出，正當外界誤以為他們「拆夥」之際，他們早前擔任演唱會嘉賓時，再度「合體」獻Sing，讓樂迷緬懷「祖與占」的日子！

天佑強調Shine從沒拆夥：「當時只係分開發展，我哋私下都有見面食飯，今次係Reunion（再聯合），重組演出幾新鮮，嚟緊會搞個大型少少嘅演出。」對於外界反應理想，又南坦言壓力頗大：「嗰次真係好緊張！始終5年冇合體，完全冇公開唱歌，我哋已經冇諗大家鍾唔鍾意，反而集中唱好首歌，唔好有錯漏，好彩默契比以前更好。」

10年起跌不再任性

在樂壇浸淫10年，Shine坦言處事和思想較以往成熟及懂性，天佑說：「以前細路仔少不更事，我行我素，任性啲，又唔係太識表達，乜都唔諗就去咗先，依家EQ高咗，穩陣咗，諗嘢顧後果。」又南接着說：「呢10年內Shine有起有跌，入行時太順利，忙到冇時間諗其他嘢，但之後起伏幾大，07年我同天佑各自喺電影發展，感覺唔同咗。」

留意Winkie Crystal

Shine出道時曾在日本受訓兼「同居」，常因小事嗌交，要助手將兩人拉開，天佑說：「嗌完交之後，通常係我講嘢先，我發嬲好快就冇嘢。」兩兄弟並肩作戰多年，熟知對方脾性，天佑說：「佢冇變，成熟咗，以前唔夠共識，依家默契更進一步。」又南則說：「天佑改變絕對大，諗嘢大個咗。」作為樂壇的「師兄」組合，Shine有留意「師弟妹」糖兄妹、HotCha及Mr.等，天佑說：「多咗好多唱作歌手同樂隊，依家樂壇乜都有，百花齊放。（再出專輯？）暫時冇諗過，但嚟緊搞緊首歌。」

談到感情狀況，天佑說：「OK嘅！（結婚？）未諗！自己仲係好細路仔。（有冇同緋聞舊愛楊愛瑾聯絡及八卦其感情狀況？）冇留意，冇乜聯絡，最多靠微博接觸。」又南則說：「我有拍拖，不過幾個月前分咗手，有諗過成家立室，最後性格不斷摩擦，長痛不如短痛。」他仍渴望拍拖，認為對繁忙的工作有「中和」作用。

後記：排骨谷「肌」

Shine出道時以陽光少男形象示人，身形偏瘦，經過十年努力，已大隻不少！患有哮喘的又南表示身體OK，有跑步健身，體會健康可貴：「搵到幾多個零都冇用，如果我呢個『1』撐唔到啲零，有幾多錢都享受唔到！」