測試 Volkswagen Touran GT

啟吾

小容積七人車，已成為潮流熱捧車款，無論新車及易手市場同樣備受歡迎，絕對買得過。日系選擇多，更顯歐洲出品物以罕為貴，福士推出Touran GT，車頭部份似足旗下熱賣車款Golf，尺碼卻只係4,397mm x 1,794mm x 1,674mm，內櫳座椅編排變化極多，更可以隨時拆走變迷你倉搬屋運貨，加上1.4公升TSI Supercharger加Turbo引擎，閒時可以快飆，假日又可以載全家大細阿爸阿媽外父外母出巡，今次出車老婆最讚成。

Touran GT車頭像極同廠熱賣的Golf，但從側面看便會看出乾坤，發現車尾的方盒車子線條，因此，後座容量亦大大大增加，容得下兩行3+2座椅，後座放平後尾箱容量更可增至1,913公升。而最貼心之處更係第二排三個座椅可以獨立放平、摺起甚至逐個拆走，為自己度身訂造座位設計，想walk-through又得，甚至拆走後排座椅擺放大量貨物亦可以，極為實用，親身試過把座椅裝裝拆拆，難度不高而且不算操勞，女車主都應該輕鬆做到。另外，豪華裝備亦落到足，車頂玻璃天幕式車頂、皮座、輕觸式音響、多功能?環、椅背餐?全部有齊，比起同級對手又多添一份豪華感。

初推出市場時，Touran GT曾創下一小時賣出二十五部的紀錄，可知車迷受落程度極高。不只內櫳實用，就是性能亦夠吸引。採用同廠熱賣得隨處可見的Golf GT 1.4公升TSI雙增壓(Supercharger配Turbo)引擎，雖然車價相宜，但亦配上品牌名物七前速DSG波箱，加減拖波玩落夠勁夠反應，而馬力亦有170匹，試駕當日車載兩人，起步加速爽勁有力，踩油即爽住去，?盤後方設有的加減波撥片反應靈敏，而且過彎時的靈活性更完全感受不到這是一輛七人車，過彎拖波可謂得心應手！

貫徹歐洲車的穩紮行車感，華實兼備。而且1.4公升引擎七人車除可在牌費上慳一筆，油耗量低至6.6L/100km亦係吸引之處，始終大部份用家都不會長時間滿載七人，細c.c.更加實際。而擒高擒低擒入車廂拍照時，亦深深體會到天幕式玻璃車頂引入天然光的開揚感以及上落的方便程度。

Touran GT規格
引擎：1,390c.c.直四雙增壓
馬力：170ps/6,000rpm
扭力：24.5kgm/1,500rpm
傳動：七速半自動波，前驅
查詢：VolkswagenHK(3698 9688)