[澳門新聞] 李靜儀：保利達極不負責任

東方不敗

李靜儀

保利達辦事處門口仍貼有小業主要求收樓的標語
兩退款方案小業主根本揀唔落手

    李靜儀：保利達極不負責任

    社會各界輪番發功要求保利達向“海一居”小業主退款後，保利達終向小業主發出退款兩方案的訊息。議員李靜儀批評保利達以短訊方式求其拋兩個方案畀小業主，而非認真對話，極不負責任。同時，她形容所謂的方案一、方案二都好有問題、揀唔落，“你求其出個短訊畀小業主剔，若小業主唔剔，你係咪當小業主唔肯收返啲錢？我覺得佢真係非常不負責任。件事拖咗咁耐，你唔即時還錢又唔同小業主對話，根本冇得畀小業主揀。”

    本報記者  報道

    做法是想拖長時間

    根據短訊所指，方案一是三年內分期返還按預約買賣合同已收取之的樓款金額（對象為希望保障自身固有權益的業主）。自簽立退款協議時計為第一期，之後每半年計為一期，首六期每期返還百分之五，第七期返還餘下百分之七十及另加提供百分之十五的額外補助。方案二是兩年內分期返還按預約買賣合同已收取之樓款金額（對象為同意只須返還已付樓款的業主）。自簽立退款協議時計為第一期，之後每半年計為一期，首四期每期返還百分之十，第五期返還餘下百分之六十。

    李靜儀分析，方案一、方案二都極不負責任。她形容“發展商好識用文字保護自己”。以方案一為例，提到“倘贏得訴訟後能成功取回土地發展，我司承諾將按原圖則及原價售予參與方案一之業主，若果不能取回土地發展但獲得理想的財務賠償，我司會向參加方案一的眾業主發放合理的額外的補貼”。她質疑所謂的額外補貼似乎是有前設，“咩叫理想賠償？你告政府都未必告得入。假設告得入，你話要索償六百億元，到時如果只判政府賠十文廿文，咁算唔算係理想？唔理想就唔畀百分之十五額外補助？”她認為有關做法其實就是再拖小業主兩三年，不單止不是履行合約賠錢，還要拖小業主，“百分之十五睇落有啲嘢賠返畀小業主，實際上三年後可能又話官司未完、未囉返塊地或賠償不理想，咁就唔使賠錢畀小業主，咁仲唔係不負責任方案？”

    應按合約賠錢利息

    至於方案二，她稱，“即供小業主欠銀行好多錢，清唔到條數，利息好勁，你攤長時間兩年百分之十咁還，又唔賠息，對即供小業主好大問題。”

    她認為方案一、方案二都“根本冇得畀小業主揀”，最簡單是即時按合約賠錢及利息。“以往都有個案是與政府土地爭議時，人哋都賠返晒錢和利息，不會綁住小業主作為佢既籌碼與社會講價，不會為爭取自己商業利益綁住啲小業主。今次拖咁耐，叫你還錢你就出D咁既方案，根本不是認真與小業主探討。”

    她斥責發展商，“至少要與小業主傾，現時拋兩個方案出來畀人揀，其實根本冇得選擇，尤其即供小業主揹住銀行利息，揀咩呀？佢即時要清銀行利息，你賠唔賠息先？兩個方案都冇講。再者，你唔係正經與小業主商討，求其出個短訊畀小業主剔，若小業主唔剔，你當小業主唔肯收返啲錢呀？我覺得佢真係非常不負責任。”