謝安琪出走環球 擬300萬贖身

小魔女

謝安琪（Kay）和環球唱片面臨攤牌分手！據知雙方合作出現嚴重分歧，環球力谷吳雨霏（Kary）上位取代Kay的一姐地位，被打入冷宮的Kay跟環球尚有3年合約，消息指Kay不甘坐以待斃，寧願擲三百萬買回自由。
當年謝安琪加盟環球後，憑一曲《囍帖街》唱紅大街小巷，橫掃樂壇頒獎禮，火速升呢坐上一姐之位，向天后之路進發，可惜好景不常，有傳Kay的經理人夏森美因太過保護Kay，曾因Kay跟陳奕迅傳緋聞與傳媒誘發誤會，又不時向傳媒和環球投訴，嘗試擺平，可惜徒勞無功！


謝安琪明晚開騷，門票銷情後勁凌厲，已封咗蝕本門。
而雙方一直就工作和宣傳方針上不能協調，加上四大唱片跟無綫發生版稅風波，令Kay的人氣下滑，特別Kay與陳奕迅等歌手安排上亞視，令她被無綫封鎖，加速滑落。
另覓碼頭早前環球簽新加盟的Kary，有感Kay地位受到威脅，因而分歧愈大，因為一直以來彼此都為宣傳工作比重、播放率、上榜位置等事向環球極力爭取。而去年環球搞聖誕派對，Kay亦沒有出席，雙方關係十分惡劣。
據知，Kay於前年才以五百萬跟環球續約５年，現在還有３年長合約，為免被環球掟入「雪櫃」等死，消息指Kay和經理人經過慎重商議，寧願擲三百萬買回餘下合約，用錢解決問題，實行東家唔打打西家，之前就有傳夏森美向Neway、星煥等唱片公司問路，為Kay尋找另一塊瓦遮頭。
認有分歧本報向夏森美求證，是否用三百萬買回餘下合約？他隱晦說：「承認同環球係有分歧，依家唔方便透露，希望完騷後同環球坐低好好傾，如果唔可以解決分歧，先考慮下一步點做。」而Kay於明晚開騷，之前有傳門票滯銷，主辦機構負責人丘亞葵向本報說：「依家賣咗九成幾飛，後勁凌厲，封咗蝕本門，我叫Kay 唔使擔心，冇錢賺唔緊要，最緊要做好個騷。」而Kay由於忙綵排個唱，連老公張繼聰昨日生日亦不能參與慶祝，在微博向老公留言對不起。

謝安琪與環球有分歧，為免入雪櫃，擬用三百萬買回自由。