 【太陽報專訊】國際巨星成龍拍戲多年打到五勞七傷，下月60歲大壽的他前晚突然漏夜秘密入養和醫院。過往因拍戲多次受傷的他，令人揣測是否身體出現問題。
成龍因「打」成名，拍動作片經常親身上陣瞓身肉搏，因而常常受傷，近年更被連番惡搞屢傳不幸消息，當中不乏重傷、命危甚至猝死等假新聞，幸見慣大場面的他對不利傳聞往往一笑置之。去年6月身在北京的他得知自己再一次「被死亡」時，還盞鬼地手持當日報紙拍照上載微博澄清，大方幽默！不過，本報昨日得到可靠消息，指他前晚突然漏夜秘密入住養和醫院，由於未知箇中原因，其健康狀況再一次備受關注！
八年冇做Body Check
對於半夜入院，成龍昨晚透過電話直認此事，但否認入院與任何突發事故有關，他聲稱趁60大壽前進行身體檢查：「係入院，不過已經出咗院喇！（身體有事？）唔係，因為今年60大壽，身邊啲人叫我入院Check吓，所以上通下通（照胃及照腸），暫時未有報告。」據知，成龍因密麻麻的工作以致冇時間做身體檢查，但近年目睹兼聽聞不少圈中人和老友因疏於檢查，至發現病徵已耽誤病情，故認為「早Check早着」，加上身邊朋友及家人從旁勸喻，他遂的起心肝在60歲前達成眾人願望。
而房祖名昨晚透過電話直認有份着父親往檢查：「係我逼佢嘅！佢已經八年冇做身體檢查喇！」他又搞笑地表示想父親長命百歲是另有目的：「我想佢過一百歲，等針對佢嘅媒體唔使搵新對象，為下一代着想，如果下一代都畀自己人踩一定紅唔番起身，所以唔好搞新人喇！搞我老竇啦，佢頂得住！」
重演「面貼面」事件
另外，成龍日前現身北京活動，主動提及與歌唱家宋祖英面貼面一事，他無奈地說：「我都習慣了，我每次都這樣，只是這次被登出來，沒甚麼好大驚小怪的。」他又拉同場的內地女主播春妮兩度上演面貼面，還反問可否上頭條。至於有巴西預言家指他將有空劫，成龍自言不迷信，質疑對方借他宣傳。 | 
