【意大利狂迷觀戰手記】唔熟我哋更加好

chan200308

達美安、柏列達、施利古、馬高華拉堤，同幾個老友一齊睇波，佢哋呢個唔識嗰個唔識，如此甚好，就係呢招搞掂你。 　

好多老友話近年香港冇電視台直播意甲（就算有都未必好多人睇），要了解國家隊現況更困難，我想講嘅係，就算俾你睇都冇路捉，莫講話冇睇開，就算我哋意大利死硬派擁躉都估唔到柏蘭迪利會咁排11人，撇開傷兵問題，柏帥呢幾年一直果敢用人，因為咁冇話冇咗邊個唔得，亦唔會好似4年前納比帶隊老化。之前啲人仲講應該重召托迪、東尼，熟意大利足球國情，就知得啖笑！

呢場波之後，大家見識過我哋達美安、施利古有幾出色，尤其為達美安喺右路好活躍，其實後備仲有唔少臥虎藏龍，好似呢場入替巴神嘅恩莫比利就係一個殺手，未見底。

我最開心係見到意大利長期有好龍門，數到遠古嘅馬基芝安尼、保方、托度、馬捷迪過去臨危受命都冇話甩拖，施利古今仗左撲右撲，除咗一次應付傳中有少少失誤，完全冇問題，球迷唔使擔心。

意大利贏得一場關鍵比賽，呢場波比去屆任何1分鐘都要好。當然，俾英格蘭太容易起腳，係後防必須改善之處。家陣以為係同組最難纏兩隊都輸波先，亦唔代表實出線，希望之後keep到今場水準。無窮離開報業多年，兩年前歐國盃喺now.com呢度寫過稿，多得藍鑽石兄再邀小弟出山，唔熟我唔緊要，希望再見大家6次！