祖兒胡歌通宵Kiss咀過翻尋味

lwl2007

容祖兒昨日於清遠出席英皇電影《DIVA》記者會，向來唱情歌耍家的她，拍咀戲亦有一手，得嘗祖兒香澤的胡歌直言「咀過翻尋味」！
容祖兒、胡歌、杜汶澤、林欣彤、陳家樂及冼色麗昨日出席英皇電影《DIVA》記者會，雖然祖兒於記者會前一晚與胡歌通宵拍咀戲，但二人昨日精神奕奕，神采飛揚，以露背裝示人的祖兒露少少Bra帶，性感誘人，難怪胡歌也直言想再親香澤！

激讚上等拍檔

祖兒得悉胡歌想對她「一咀再咀」之後說：「咁犀利？我都係喎！胡歌係靚仔對手，以往我啲對手多數甩皮甩骨，冇乜好似今次咁浪漫嘅戀愛片段！（胡歌係擇偶心水？）工作上絕對係上等，其實同胡歌拍通宵咀戲時，我畀助手笑我皺晒眉，嘴又冇擘開！」

祖兒坦言新片開拍前，已感到非常緊張：「我演戲雖然唔係0分，不過做電影主角真係有壓力，今次好多殘酷內心戲，要表現娛樂圈真實一面，真係冇信心，多得監製杜汶澤多次游說鼓勵！（怕被話係票房毒藥？）還好，我都咁形容自己，但我想用行動扭轉呢種睇法！如果呢部得，我會多啲拍戲！」提到同片的師妹林欣彤來勢洶洶？祖兒說：「呢個圈需要新血刺激，我當初都係新人！（無綫同『四大』破冰？）都好想亮相其他電視，如果有歌星賀台慶都好，我鍾意玩！」

杜汶澤力撐天后

至於胡歌則說：「第一次同祖兒合作，佢好謙虛、易相處、冇架子、狀態好、表現自然，咀戲冇NG！不過要多角度拍攝，所以咀很多次，起初有點尷尬，但一回生兩回熟，咀到第三次就想再咀第四次，依家咀到嘴有點腫！」另外，期間主持笑指祖兒是票房毒藥，杜汶澤即表示對祖兒信心十足：「周潤發未被發掘前都係票房毒藥，依家係7億票房主角，人人都有機會成為票房霸者！」
                                                                                                                                      
祖兒與胡歌天后配型男，感覺煥然一新。

                                                                                                              
祖兒露背回眸一笑，令人眼前一亮！

                                                                                                              
陳家樂與林欣彤合作拍戲，青春無敵。

                                                                                                              
冼色麗笑容燦爛，謀殺不少菲林。

                                                                                                              
祖兒孭飛的新片開拍，昨日率先舉杯預祝成功。