李思捷咒杏兒甩拖

小魔女

李思捷再有緋聞傳出，他回應時四両撥千斤，笑言明戀新拍檔胡杏兒，且等待對方分手才會給女友春卷「名分」，大搞四角關係，惟杏兒得悉後覺被擺上枱並笑說：「我准佢畀名分春卷，為咗佢我轉番地下情囉！」
杏兒、思捷、湯盈盈等昨出席新劇《換樂無窮》宣傳活動，由於該劇高開三十一點收視，令台前幕後開心不已。思捷早前被本報拍得撇下春卷與酷似林欣彤的女伴夜蒲掃背，他昨笑謂：「我要澄清，最近我鍾意胡杏兒類型，唔係林欣彤囉，我乜都畀晒杏兒。（春卷冇呷醋？）佢出去玩仲犀利，我跟佢學咋。（幾時畀名分人哋？）等杏兒同黃宗澤分咗手先啦，多謝畀C1頭條我。」
被迫轉玩地下情杏兒得悉被擺上枱，即打趣：「我准佢畀名分春卷，為咗佢我轉番地下情囉，咁都拖我落水！」杏兒坦言現時生活美滿：「冇乜嘢就唔好搞咁多啦。（認定男友？）OK開心囉。」她表示一直以來拍拖相處的時間其實不多，就連出埠旅行也僅得一次：「可能要等到退休之後！」而杏兒私下與劉愷威相熟，談到對方公開戀情，她也戥愷威高興，但消息傳來有點愕然。


杏兒、思捷分腸同味認真甜蜜。


杏兒穿上刺繡裙別有韻味。
有傳杏兒推薦鄭嘉穎去Neway，她澄清說：「我自己都未搞得掂，點會推薦人呢？但我都知嘉穎好搶手，我都好想似佢咁。」另杏兒於新港城活動中穿上台灣頂級刺繡大師製作的刺繡裙擔任開幕嘉賓，獲得現場小朋友送上繡球恭賀她成三料視后而感到開心。