天明打本家蔚搞生意

小魔女

洪天明及周家蔚前晚舉行第二場婚宴與好友玩到半夜，昨日兩人即「復工」，新娘家蔚於下午二時多身穿白色Tube Dress出席活動，她笑言飲到「啤啤夫」的天明才剛起身：「佢醉到要兄弟扶上房，不過仲識自己除呔。」活動上，家蔚承認婚後酬勞有加幅，對於被指盡得兩位奶奶愛錫，她冧笑說：「咁我抵錫吖嘛！（慣畀人叫洪太未？）未o架！我哋之前已經互叫老公老婆，依家感覺唔同，要一世照顧佢。（婚宴使咗幾錢？）未計，都過百萬。」

家蔚昨日下午以性感打扮出席活動。
傍晚家蔚返酒店會合天明，將大批雜物搬上車，天明笑言前晚high到自隊，因此再錯過洞房夜，家蔚則透露婚宴上有玩食蕉咬提子等三級遊戲。
晚上天明錄影《五覺大戰》，提到洪金寶表示已送樓，他說：「唔係o架！仲要供。（咁講驚佢唔開心？）唔驚，我住緊層樓都係佢送，要問清楚佢講邊度，我都想喺市區買樓畀媽咪，嚟緊我會返內地拍劇，希望家蔚唔好工作跟我返去，我都會預筆錢畀佢搞生意！」

天明與家蔚離開酒店時將大批雜物搬上車。