家輝亂報喜 君如谷爆鈕

小魔女

吳君如一直恨添丁，前晚她與老友張家輝等人晚膳，離開時家輝突然「爆料」指飯局是慶祝君如有咗，君如聞言即嚇得爆鈕露Bra及露出白滑胸口，還指摘家輝多事又麻煩，催促他急急上車走人。
吳君如與張家輝向來老友，兩家人還不時交流湊女心得，一直也想再添丁的君如，前晚則相約家輝等友人前往銅鑼灣晚膳，但同行卻未見老公陳可辛及家輝太太關詠荷，反而君如提名參選港姐的袁嘉敏則在場。


君如被屈有咗，尷尬上車，搞到爆鈕露Bra。


家輝、君如與袁嘉敏晚飯後一齊步出。
鬧麻煩友君如與家輝等人於食店逗留至晚上十一時許才埋單離開，當家輝步出門口時見記者在場即表現愕然，尾隨的君如則笑笑口。家輝被問及與君如飯聚是否傾合作時，他突然「爆料」，笑騎騎鬼馬地說：「因為君如有咗呀，所以咪約佢食飯一齊慶祝囉。」在旁的君如聞言一臉尷尬不知如何是好，最終她邊笑邊指着家輝「發難」說：「又係你呀，成日都係因為你，搞到我畀人發現，累到我又畀人影到喇，你真係好麻煩。」
君如沿途步往上車時亦不停笑罵家輝，激動的她坐下時還爆了恤衫鈕釦，露出白滑胸口及白色Bra，當她見家輝仍未上車時，即心急催促他說：「你快啲一齊上車走啦。」

君如手指指，罵家輝多事。