蘇施黃父母接受 直認同性戀

小魔女

繼黃耀明勇敢公告天下「出櫃」後，藝人蘇施黃亦直認是「攣」！已有同性密友金燕玲的她，前晚在電台節目中感激家人接受她的另一半；而曾遭歧視的明哥則發聲為同性戀者爭取社會權益。
已有同性密友金燕玲的蘇施黃，前晚在電台節目《大龍鳳》探討「攣」與「直」的話題，更承認本身是「攣」。不改鬧人本色的阿蘇在節目中多次窒嘉賓主持林以諾牧師，當林以諾指攣是有數據可計時，阿蘇即寸嘴說：「多餘啦！我親自經歷，你又唔係嗰啲人，知鬼咩！」
直人難明感受阿蘇感激父母對她的接受：「我冇講過半句說話，但父母、兄弟姊妹、屋企人、朋友全部人冇一個唔接受我，呢個係好感恩。」林以諾問阿蘇怎樣說服父母？阿蘇說：「如果要說服阿爸阿媽，佢哋就唔夠愛我。父母對我嘅愛係無限，無論我變到點樣都係咁愛我。我身邊所有女朋友、女伴，每一個佢哋都可以接受得好好。」


蘇施黃與金燕玲（右）每次出席活動，例必不會並肩而行。


承認同性戀的黃耀明不停為「同志」爭取權益。
林以諾再問阿蘇是否主動去講？她即連珠炮發：「使唔使舉手話畀阿爸阿媽知我係同性戀病患者？你都傻！都話你啲直人唔明咯，好鬼煩！可唔可以搵啲攣人？大家啱傾啲，好鬼嘥氣。」最後阿蘇說：「佢（林以諾）直o架！點可以將佢個腦擺喺我攣嘅諗法，講極都唔明。」
爭取同性結婚早前認出櫃的明哥昨日出席「國際不再恐同日」，為同性戀發聲爭取權益。他坦言達明一派出道時曾遭歧視，當時有位媽媽拖小朋友經過他身邊，該母親對兒子說；「呢個咪達明一派嗰個死基佬！」他覺得該母親很無知，不應該這樣教仔。明哥希望議員可以為同志爭取權利同平權，例如結婚、領養、福利等。他說：「點解同女人一齊就唔使匿埋？我哋同性戀就要匿埋，社會對同性戀係雙重標準。」
文：音樂組

蘇施黃在節目中狂窒林以諾，但無損兩人友誼。