楊怡法拉「后」台硬杏兒變炮灰

無綫紅人陳志雲無罪回歸，勢揭開另一場人事內鬥序幕，連帶「視帝后」亦大轉勢！樂易玲隨時失勢，身邊的謝天華、胡杏兒與鍾嘉欣等分分鐘齊齊被飛出局，補上的自然是「雲派愛將」如楊怡、黎耀祥及馬浚偉等！

無綫製作資源部總監樂易玲，向來被外間形容與陳志雲的關係是「勢成水火」。志雲去年三月捲入涉貪案，樂易玲上庭作供時不留情地指證五位花旦免費出席其簽書會，情況如同被他「賣豬仔」！「雲派愛將」亦因「阿頭」捲入官司而紛紛被冷待，相反樂易玲身邊的「樂派紅人」鍾嘉欣、胡杏兒、謝天華、徐子珊、林峯、鄭嘉穎及黃宗澤等齊齊抬頭，並在今年開創佳績，各人獲得不少演出機會，例如鍾嘉欣的《點解阿Sir係阿Sir》、謝天華及徐子珊的《潛行狙擊》、鄭嘉穎與胡杏兒的《怒火街頭》以及有兩部台慶重頭劇《回到三國》及《不速之約》在手的林峯，個個均有望衝擊「視帝、后」。

否認辭職傳聞

不過，志雲前日獲判無罪，隨時強勢回歸，有消息指樂易玲深感不妙，決定十一月離職，「樂派紅人」亦大有機會被飛出「視帝、后」名單，「雲派愛將」陳法拉、楊怡、馬浚偉及黎耀祥奪獎呼聲高唱入雲。據知，憑《潛行狙擊》叫好叫座的陳法拉原是「樂派紅人」，但自從新老闆陳國強入主後點名讚其演出後而起變化，皆因陳國強與志雲關係密切，陳法拉自然「歸邊」有大食大！

記者昨日致電樂易玲問及辭職傳聞，她即矢口否認：「有乜可能呀！唔會囉！我點會唔做？咁辛苦先等到咁完美嘅結局，大家乜嘢事都冇，士氣又重振，所以要更加畀心機做，希望以後唔會再有唔好嘅嘢傳出。」問到有指志雲甩難後，被無綫棄用的王喜即獲放生，樂易玲直言王喜與無綫關係不變，有合適的劇集一定找他參演。

祥仔望三連霸

「樂派紅人」人心惶惶，問到樂易玲失勢後成獲獎阻礙，杏兒說：「成日都有呢啲傳言，但我唔擔心，最緊要做好自己。」林峯亦表示不以為然：「獎項對我嚟講唔係最重要，最重要係得到觀眾認同。」被列「雲派」的陳法拉強調沒分黨派，私底下亦沒有與高層聯絡，至於會否覺得奪視后機會因而更大，她淡定地說：「離台慶都仲有幾個月，台慶劇都未出，呢啲言之尚早！攞獎唔係睇高層，係睇角色同收視。」

連奪兩屆視帝的黎耀祥再傳獲「秤先」，他只平靜地說：「其實我同志雲唔係咁熟！外間覺得我係『志雲派』係抬舉我啫！今年套《法證先鋒3》仲未出街，攞獎都係五五波！無綫近年好重視民意，如果可以三連霸締造歷史就梗係想，但鄭嘉穎同林峯都會係幾強嘅對手。」另一被視為「雲派愛將」的馬浚偉則表示，感激志雲履行不少承諾：「我對獎項一直係隨緣，當年傾續約係同樂小姐磨合得唔係咁好，最後係陳生同曾勵珍幫我，佢對我履行咗好多承諾，好似開咗《大廚出馬》畀我，實現咗我好多願望！我唔知係咪『志雲派』，淨係知我真正嘅恩師係曾勵珍，目標始終係拍劇。」