李嘉欣珠寶留晒畀新抱

lwl2007

大美人李嘉欣不但疼錫愛兒Jayden Max，就連未來新抱亦預先表示疼愛，打算將其首飾珍藏送給未來新抱。她坦言在全世界之中，只想得到囝囝Jayden的喜歡，地位比老公許晉亨更重要！

大美人李嘉欣（Michele）昨日出席Forevermark活動時，佩戴閃爍鑽飾出場，盡顯高貴迷人美態。Michele表示自己的首飾珍藏都會送給愛兒許建彤（Jayden Max）的未來太太，即其未來新抱。問到會否送給未來的女兒，她說：「唔知，未有Plan。唔係特別話好恨要個女，湊一個BB係唔簡單嘅一件事。（最難係咩？）最複雜係要勞心，一彈起身就衝去睇佢，會暈一暈。（一個就夠？）生係一回事，養同教係超級大件事。」她指囝囝現在才六個多月大，未有為他排隊報名校，等他再長大些才會安排上學。

妒忌老公「得寵」

Michele又笑言囝囝雖然未懂說話，但日前竟說BB語叫她做「丫烏」：「我尋日錫佢時，佢話『丫烏』，我同佢講話媽咪唔係『丫烏』。（好冧？）叫我『丫烏』唔會好冧。（囝囝會做咩冧你？）佢好鍾意爹哋，爹哋咩都唔使做佢已經好鍾意。（有冇呷醋？）有呀！做得嘅都做晒，覺得好唔平衡！老公話佢咁鍾意我，我就咁鍾意個仔，個仔又咁鍾意佢咪啱囉！（聽完條氣順番？）唔順呀！我依家全世界淨係想Jayden一個人鍾意我啫！（囝囝喺你心中地位高過老公？）咁梗係啦！」

                                                                                                                                           
嘉欣佩戴閃爍鑽飾，盡顯迷人美態。


                                                                                                              
嘉欣落足眼力，難道為未來新抱揀首飾？


                                                                                                              
行騷的Alice B.，艷光不輸身上鑽飾。