超雲山聰翹手晒恩愛

lwl2007

賭王何鴻燊三房千金何超雲昨晚與陳山聰首度拍拖出席公開活動，超雲全程翹實男友，大晒恩愛！

賭王千金何超雲與陳山聰的戀情成為全城熱話，昨晚超雲與陳山聰首次出席公開活動，大露背現身的超雲全程翹實山聰，合照時笑容一致，山聰盡顯男士風度傍實女友，即時加分！

至於超雲妹妹超蓮前晚出席活動時成為被追訪目標，當晚嘉賓還包括陳慧琳（Kelly）、高圓圓、桂綸鎂、張雨綺及陳喬恩等。超蓮透露家姐心情頗佳，問到覺得陳山聰如何？她說：「幾好！我有睇佢啲劇，幾好呀啲戲！（佢對家姐啲戲幾好？）唔係！唔好畀個（氹）我踩，佢對家姐好好，我哋見過幾次。（陳山聰離過婚喎！）聽講過，不過冇留意。（家姐好勇敢？）我會祝福佢，作為佢個妹我都戥佢開心！鍾意一個人同有冇離過婚冇關係。」問到會否驚家姐感情被騙？超蓮說：「我會保護佢！（陳山聰啲戲咁好？）唔緊要！我哋有好多兄弟姊妹保護佢，我諗佢識分。（家姐愛得好盲目？）愛好難講，冇分盲唔盲目。（覺唔覺家姐好迷？）唔迷就唔係拍拖啦！但我唔覺得佢唔清醒，家姐都廿二歲喇！好難決定佢鍾意咩人，只要佢鍾意就OK。」她強調若然自己拍拖，不會像家姐一樣公開戀情。

陳慧琳否認懷孕

另外，被傳懷龍鳳胎的Kelly以束腰裝亮相，以Fit爆身形粉碎謠傳：「未有BB，我都好想有。（要休息一年？）冇話要休息幾耐，唔係好急要。（身體點？）OK。（會用人工定自然方法？）冇乜所謂，問醫生意見，我好Open。（以追女為目標？）冇所謂，乜都要，搞好身體先。」對於有報道指她的愛兒劉昇（蝦餃仔）頭髮太長似女仔，她說：「係我幫佢剪嘅，我唔識得剪男仔頭，又要趁佢瞓咗先剪到，都係時候要剪，其實男仔長頭髮都幾得意。」同樣傳懷孕的張雨綺，則穿上四吋高跟鞋到場，以行動粉碎傳聞。
                                                                                                                                            
超蓮悉心打扮出席活動，例牌騷長腿。


                                                                                                              
超雲與陳山聰翹實出巡黐到實。


                                                                                                              
接受訪問期間，超蓮一度掩嘴喪笑。


                                                                                                              
陳喬恩來港出席活動。


                                                                                                              
陳慧琳穿上束腰裝示人，粉碎懷孕傳言。


                                                                                                              
桂綸鎂（左起）、高圓圓及張雨綺難得碰面合照。