傅穎爆大鑊數謙仔施「暴」

lwl2007

傅穎近日在微博暗示遭暴力對待，又離奇出示腳傷照片似有所指。她昨日出席活動時終忍不住爆大鑊，除承認秘密撻着羅仲謙，更力數男方玩背叛，坐擁小三一大籮，最慘是謙謙劈腿行為被傅穎揭穿，疑似上演「拳頭o趙低這女孩」真人騷。

即將赴京發展的傅穎近日在微博暗示慘遭暴力對待，身上留下一道道傷痕，令人懷疑今次「拳頭o趙低這女孩」事件，是緋聞男友羅仲謙所為。自去年傅穎與謙謙被傳出現小三掟煲後，二人十足仇人一樣，當大家以為此情不再，原來「傅羅戀」早已秘密翻撻，還扮到勢成水火，玩地下情護愛苗。

微博上載腳傷照

可惜有指謙謙靚仔多情，據知拜倒其巨胸下，不乏圈內、外女生，難怪傅穎近日不時在微博勁呻遇上感情騙子，還寫過「求上天不要讓我們遇到騙子，也不要再做傻子」、「專一不是一輩子只喜歡或愛一個人，而是他/她是男女朋友關係時，一心一意，不會和別人搞曖昧，也不會劈腿。」等慘絕人寰金句，上月27日更上載一幀腳傷照片，還寫道：「那些痛和傷痕，會隨着時間淡化，不論是在身上，還是心上的。」矛頭直指施暴者。傅穎昨日出席時裝活動時，更忍不住盡爆大鑊，似乎下定決心為情斬纜。

記者：記　傅穎：穎記：

件事係發生你入行前定入行後？

穎：（起初欲言又止，言語間有所顧慮）係入行後，自己唔想多講，怕被指做新聞，我唔想畀人話我模棱兩可，想搵嘢講，我每次講嘢都有顧慮，但句句係真心話，總之我係有感情身心受創。但我只係想去北京前放低，唔想精神虐待自己，只係想抒發感受。

記：咁邊個打你？唔講邊個係咪想保護前男友？

穎：唔係，只係放低鬱結，唔係為宣傳。

記：（再三追問）其實係邊個呢？

穎：（鼓起勇氣）我有同羅仲謙一齊過，分開唔止一次、背叛亦唔止一次，呢段關係身心受創，我係一個女仔，過咗去唔想再諗，亦唔想成日都講。

分完復合又再分

記：你哋幾時一齊？

穎：我哋拖拉咗年半，係上年開始，我當時唔知佢有女友，我唔想再放喺心度，日日去諗，精神折磨自己。我最錯嘅事係同番佢一齊，再發現佢背叛我，佢根本冇同女友分開，仲要同多兩個女仔一齊，呢件事對我打擊好大，我個心好難受，身體都有受傷。

記：你話身體受傷，係咪指羅打你？

穎：（再次欲言又止，停頓數秒後）總之我周身都係瘀傷，若有人問我，我就話係跌親，都過去咗。

記：咁你意思係咪對過你郁手?

穎：總之唔係跌親。

記：點解打你？

穎：因為我揭穿咗佢（指一腳踏四船）！

記：有冇諗過報警？

穎：我冇諗過！我唔想製造話題，亦冇咁嘅必要，總之我唔想再提呢個人個名。

記：當初復合係應承你同女友分開？

穎：係，我最錯係同番佢一齊，我好自責。

記：你哋幾時正式分手？

穎：我哋上年分開，隔咗幾個月又喺埋一齊，上個月又再分開，同埋又打我，我哋真正分開嘅原因係發現佢有其他女仔，我哋為呢件事嗌交。

記：佢對你出拳？有冇用武器？

穎：冇用武器！

此外，當事件爆出後，不少傅穎Fans在微博力撐偶像，更加怒斥羅仲謙是「賤謙」，有人更寫：「真係火都嚟埋呀！超級世紀賤男！」
                                                                                                                                              
傅穎昨日笑容滿面地出席時裝活動，更忍不住盡爆大鑊。


                                                                                                              
傅穎力數羅仲謙不是時面容扭曲。


                                                                                                              
戴上黑超的羅仲謙，匆匆出席記者會。