吳浩康不甘被屈：我冇再濫藥

lwl2007

吳浩康（Deep）與莊思敏5年情宣告玩完，有指分手導火線是Deep再度濫藥，令這段幾達談婚論嫁關係不能再掹！Deep接受本報記者訪問時坦言心情已直插谷底，並怒斥有關濫藥指控純粹老作，英皇會保留法律追究權利！

現年28歲的吳浩康與31歲的莊思敏這段姊弟戀，一直不被睇好，皆因Deep曾因管有藥物被捕，令事業直插谷底，加上莊思敏是大馬拿督千金，二人身份更見懸殊。雖然兩口子不理閒言閒語，更達談婚論嫁的地步，可惜最終也經不起時間考驗，於上月秘密分手，為5年情畫上休止符！

有指分手導火線是因為Deep再次濫藥，令莊思敏忍無可忍，最終狠撇愛郎！而莊思敏近日把多年長髮剪短，似乎是希望有個重新開始！據知，雙方在和平氣氛下分手，莊思敏亦有在微博上宣布分手：「我們雖然分開了，但我們依然是好朋友！」對於有關對Deep的指控，為了保護舊愛，莊思敏昨晚在微博寫道：「一段關係要去到這個地步，我們都很心痛，我們的分開是因為長期性格不合，跟甚麼壞習慣無關，希望大家不要有太多猜測去傷害任何一方。」而Deep在微博也跟莊思敏口徑一致，並表示多謝大家關心，還在Facebook內寫上正與莊思敏在交往中，顯然對舊愛難捨難離。

溝通出現問題

對於被指濫藥，Deep接受本報記者電話訪問時說：「絕對（說了3次）唔係！我冇再濫藥！」他表示雙方分手差不多一個月，未公開是因為仍未商量好如何向外界交代。問到是否因為要在這段時間箍煲？他說：「一個人做錯就話箍啫！我哋係相處咁多年溝通出現嚴重問題，思想出現分歧，係價值觀唔同！」他再三強調分手原因是溝通問題，還怒斥有關濫藥指摘純粹老作：「我真係好困擾！唔知點解本周刊咁寫，分手係我哋兩個人嘅事，點解寫到咁？我係有夾Band，冇識啲唔好朋友，只係準備出碟，真係講到好荒謬！」對於周刊指莊思敏不滿他濫藥，Deep怒氣沖沖地說：「根本冇問呢啲問題，佢哋只係作問題，再作埋答案！」

畀人按住嚟砌

Deep坦言有關報道嚴重影響現時的保險工作：「真係好影響形象！呢啲唔係一般負面新聞，你話我溝女，最多咪做第二行！」對於被指溝女，他說：「識佢知佢乜性格，如果係嘅一定講出嚟，我知有人想我哋分手o架！我依家心情好差，畀人按住嚟砌，講乜都冇用。」他表示莊思敏身在北京，二人曾就此事通電話，並絕對深信莊思敏沒有放風。至於會否一起出來解釋，則會跟公司商量才作決定。而Deep的經理人霍汶希在電話力撐Deep沒有濫藥，對於周刊的指控，她強調會保留法律追究權利。

                                                                                                                                          
對於被屈濫藥搞到分手，吳浩康怒不可遏。


                                                                                                              
莊思敏出言維護吳浩康，澄清分手只因性格不合。