謝安琪萬箭穿心 食屎論贏盡聲援

lwl2007

謝安琪（Kay）一直低調參與慈善，去年獲認同成為《十大傑出青年》，好形象維持不足三個月，本年二月接受訪問時竟道出「餵仔食屎」粗鄙言論比喻傳媒與讀者，即惹來網民質疑，Kay恍然大悟：「弊！失言！」並承認「食屎論」是個教訓，教她學懂慎言。

我講呢句說話當然有我嘅意思，點解要用咁激烈言詞去講，其實我係成功咗，令大家諗吓係咪真係咁衰呢？當一啲唔好嘅報道寫畀讀者去睇，就好似做啲咁差嘅嘢畀人食，件事引發咁大嘅討論，初初都大壓力，以為「弊！失言！」係咪引起大家唔開心呢，因為好怕我啲純品歌迷會唔開心，驚佢哋誤會我，後尾我上網睇番一啲討論同YouTube嘅言論，發現支持嘅人好多，覺得炒作新聞、誇張失實報道係好不負責任，情況就好似畀啲咁嘅嘢人食一樣，仲要夾硬「質」人食，仲話人哋鍾意食，好多留言嘅人唔係麻木撐，係言之有理。當然，經過傳媒報道出嚟，將件事講到一面倒就惹嚟大家指摘，但我好撫心自問，睇番網上討論同反應，其實支持我嘅人好多，我就放心，所以我唔介意大家覺得我講呢句說話係咪失言。

句句肺腑之言

當時引起咁大回響，我冇諗過要退出，我清楚知道自己講咩，我唔係硬頸同死撐，講每句說話都唔能夠討好所有人，我只係真心同直接了當，我覺得呢句說話冇傷害任何人！我只不過作一個比喻講吓呢啲咁不負責任報道，我覺得冇問題喎！我又唔係講粗口，亦唔係拎呢啲屎出嚟「質」人食，只不過比喻，大家應該諗吓，一個人要用咁極端嘅比喻去講呢件事，佢一定有佢嘅道理同原因。我可以用吸毒去比喻，一樣係冇益同不負責任，但點解要用呢個詞語去講，任何人都知呢樣係唔好，但毒品仲有人會選擇去食，但係屎冇人選擇去食，所以我覺得荒謬程度去到咁樣我先會咁講。

最怕斷章取義

但點解我講完一刻有擔心，係因為呢個世界太多以訛傳訛同斷章取義，當大家唔知我乜頭乜路去講呢句說話係可以好震驚，真係有去睇吓我咩情況、咩理據下講。其實全部人都好支持呢件事，唱片公司同經理人都支持我，有唱片宣傳人員同我講，等人講呢啲說話好耐，但係講呢啲說話梗係冒險啦！咁覺得我本住理直氣壯真心去講，亦唔難睇同OK吖！我係個腦諗乜就講，唔係好修飾，我覺得一個人本住好心去講嘅嘢，唔需要刻意用啲好華麗言詞去堆砌，我永遠覺得有道理就唔需要擔心，咁起碼過到自己嘛！


PROFILE姓　　
名：謝安琪（Kay Tse）

出生日期：1977年3月13日

身　　高：5呎3吋

家庭狀況：06年突然宣布懷孕、與歌手張繼聰訂婚，07年1月舉行婚禮，同年6月，誕下兒子張瞻。

演藝成就：08年度「四台聯頒音樂大獎─傳媒大獎（歌手獎）」

08至2010年度連續三屆「叱咤樂壇女歌手（銀獎）」

08、09年度連續兩屆奪得「新城勁爆女歌手」、「新城勁爆我最欣賞女歌手」

2010年度「新城勁爆亞洲歌手大獎」

2010年度「香港十大傑出青年」

                                                                                                                                         
因「食屎論」引來軒然大波，令Kay明白到慎言的重要。


                                                                                                              
心直口快的Kay，最怕被人斷章取義。