齊齊動手“食平啲”

綿羊

齊齊動手“食平啲” 周 中

齊齊動手“食平啲”     最近有雜誌叫我玩次“食平啲”，內容係去街市用一百文買海鮮來煮五道餸，聽落已經難度不小。不過老周我親自出馬當然不負衆望，買咗石斑、紅衫魚、中蝦、蜆同魷魚，散錢拎去買埋蒜心、紅菜頭同涼瓜，啱啱好一百文清袋。其實我都知係街市老闆畀面畀折頭，認眞一計呢餐原價大概要一百四十文度，不過當四人分來計，其實都唔算貴喇。     買完材料返來就開始郁手，今次整嘅五道餸係欖角蒸石斑、涼瓜炆中蝦、紅菜頭豆腐紅衫魚湯、黃沙蜆煲粥同蒜心炒魷魚，一共用咗一粒鐘度，抵食又快脆。當然煮得快至緊要唔係手腳快，而係要識得安排步驟。有得用雙爐頭煮食就最方便，然後記得煲粥煲湯行先，炒煮打後。爐頭正忙嘅時候就要準備配菜，先沖洗石斑同紅衫魚，然後將涼瓜、蒜心、紅菜頭呢啲配菜洗淨切段。將紅菜頭同豆腐放入滾湯之後將紅衫魚煎香，湯煲二十分鐘就可以放紅衫魚，再煮五至十分鐘就可以熄火。跟着白粥都差唔多開花可以落蜆喇，幾分鐘又搞掂一味！呢個時候有爐頭空出來，就可以蒸石斑魚、炆中蝦同炒魷魚。雖然煮餸唔使手腳並用咁誇張，但記得炒煮都要動作快，過咗火候啲食材就冇咁美味喇。     當然熟能生巧，做多幾次練習，包你越煮越純熟！無論男性女性，多啲練吓煮飯，同屋企人分享吓成果，何樂而不為呢！