曹敏莉送金玫瑰賀妹變中女

lwl2007

樂壇新人曹蕙蘭昨日舉行生日會慶祝25歲，自嘲已變中女，姊姊曹敏莉除了佗住BB撐場外，更送上6支金玫瑰，姊妹情深！
曹敏莉（Mandy）妹妹曹蕙蘭昨日25歲生日，在中環舉行生日會暨首個新歌發布會，獲全家總動員撐場，腹大便便的Mandy透露已為妹妹準備生日利是：「我知佢好努力唱歌，所以我哋成家人嚟支持！佢成日摸住我個肚唱歌，老公就播莫扎特，BB聽好多唔同音樂o架！」對於Mandy送上6支金玫瑰，曹蕙蘭笑說：「我唔會拎去熔咗佢，會放喺床頭！」兩姊妹更即場錫錫，場面溫馨！

望BB健康美麗

席間，曹蕙蘭自彈自唱林憶蓮的歌，並向家人獻唱陶喆的冧歌，她自爆綵排時感動落淚，更自嘲25歲已開始踏入中女階段，提到生日願望，她說：「世界少啲災禍，Mandy個BB好健康好靚！（有咩慶祝活動？）今晚（昨晚）會同屋企人去唱K！」她透露7月推出首張EP，當中會有跳舞歌。

另外，對於有傳前有線主播余思敏結婚，身為好友的曹蕙蘭說：「唔知佢係咪未通知我呢？我會主動問吓佢！」至於林峯與潘霜霜的「床照」外洩，Mandy直言與林峯只是同事，不知他拍拖：「係人都會拍拖，不過我唔評論喇！」
                                                                                                                                             
Mandy（左）送上金玫瑰，曹蕙蘭笑到變「曹四萬」！

                                                                                                              
曹蕙蘭自彈自唱，多才多藝！

                                                                                                              
曹蕙蘭（右三）25歲牛一，家人總動員到賀。