城城熊粉緋緋吹喇叭

王腳立

郭富城前晚出席新片首映時心情大靚，全程手舞足蹈，表情多多。最後祝酒時，他更High爆自隊香檳，認真風騷！
郭富城、楊采妮、梁家輝、謝婷婷與男友安志杰等前晚出席《寒戰》首映禮，未知是否與緋聞女友熊黛林（Lynn）度過正日生日共享春宵後心情靚爆，城城有問必答，最後祝酒時更自隊香檳，非常風騷！
楊采妮游水怕偷拍
問到有否與Lynn慶祝，一直拒認戀情的城城搞鬼地說：「衷心祝佢生日快樂，希望我哋友誼永固、友誼長存！（有指你送名車畀女友做生日禮物？）唔係囉！（送咩禮物？）諗諗啦！送咗都唔講！」出名愛車的城城更自爆添置新車：「係開篷車嚟嘅！個車牌係我英文名AAR0N！」

而楊采妮被問到有否安慰近日宣布離婚的黎明，她說：「人哋嘅事唔想多講，同佢都好耐冇聯絡啦！」並透露最近經常游水，問到會否怕被偷拍？她搞笑地求饒：「我會着啲唔會走光嘅泳衣，希望大家唔好影我啦！」

另一邊廂，城城消夜腳余文樂前晚在活動上，力撐台灣藝人兼波友陳建州（黑人），對於黑人被拍得夜蒲錫女，樂仔說：「係咪打招呼，係禮貌咋？大家輕手啲，佢始終結咗婚。其實佢好小心，知道香港有狗仔隊，況且佢好少出去玩同埋唔飲酒，我覺得同朋友出去玩都好正常。」
影視組

城城High爆扮隊香檳，心情靚絕！

城城和梁家輝大擺型佬甫士。

余文樂力撐好友黑人夜蒲。

楊采妮揚言經常游水，但着記者不要偷拍。


婷婷與安志杰拍拖到場晒恩愛。