大閘蟹最緊要識揀

綿羊

大閘蟹最緊要識揀 周中

眨吓眼話咁快已經踏入十一月，即係今年食大閘蟹嘅黃金時節，各大蟹迷係時候可以準備發功喇。不過如今大閘蟹嘅防偽標誌未必頂用，揀靚蟹都係要靠自己眞材實學。記住早前介紹過嘅“青背”、“白肚”、“金爪”、“黃毛”四大揀蟹口訣，專門瞄準蟹殼有光澤，蟹身飽滿，蟹肚雪白，蟹爪滲油、帶黃色蟹毛嘅鮮蟹就冇有怕喇。仲要記得區分乾蟹同濕蟹，濕蟹水份太多，肉質口感方面應該係乾蟹更勝一籌。專家敎路，乾蟹一般用網袋或草袋裝，濕蟹就養喺玻璃缸入面，買蟹嘅時候留神喇。     如今各大酒店食肆都見有大閘蟹賣，如果外食當然要揀返有信譽嘅商舖來幫襯喇。唔怕自吹兩句，今年老周我都落足心機整咗個大閘蟹宴，今個月頭一早預備咗成批又肥又靚嘅大閘蟹招呼各方好友。今次大閘蟹宴仲搵埋內地師傅切磋廚藝，可以話係專程炮製，有“王府蟹鉗凍”、“蟹粉小籠包”、“蟹膏銀皮”、“濃湯蟹粉海虎翅”等各路蟹粉菜式，主打上海風味。當然唔少得清蒸原隻大閘蟹，再配返碗特製嘅薑茶湯圓來驅寒暖胃，寧舍順喉。認準我老周呢個嘜頭，點都食得有滋有味喇。