公開秘密夫妻鬆口氣

lwl2007

袁詠儀當年公開承認被富商照顧，事前竟然未有跟老公張智霖（Chilam）商量，事後亦未有影響夫妻感情，反而她從此鬆了一口氣。

我公開承認之前，冇同張智霖商量過o架！我本身性格係咁，就好似個節目事前話畀啲問題我睇，我都冇睇過，因為畀我知道咗，我會計算講啲乜嘢令到自己好好，呢樣係咪人哋想知，係咪真心呢？講唔到大話，我會舒服啲。

公開承認之前，佢已經知道件事，講咗之後嘅反應係大家都鬆一口氣，冇咗心中嘅嘢，可以面對？我係！唔知佢係咪呀！亦冇深入了解佢，因為覺得感情已經過去咁多年，唔會因為講呢樣嘢出嚟會影響到大家囉！張智霖畀我嘅感覺係每個人都有過去，佢都唔會將佢嘅嘢講畀我聽啦！我亦都唔問，過去就係過去，知道又點呢？呢一刻我哋咁開心，做乜執着以前嘅嘢呢？我哋冇呢個習慣，總之我自己就鬆一口氣，唔使擺個秘密喺心，唔想畀人睇係咩一段關係，我話畀人知，其實係真係男女拍拖關係！

人哋睇呢件事，一定係諗「照顧」，實則佢又真係照顧過我喎！畀飯我食，畀禮物我，病有人照顧，但睇自己點睇，同在意乜嘢人點睇自己，我在意老公、我個仔、同自己點睇自己，多過甲乙丙丁點睇，你哋話我係咪畀人包，我點講你哋都會放一個詞落我度，就算真係，對你嚟講，我話幾開心，你要唔承認，我都冇辦法o架！至於係咪人生污點？哈哈……唔止呢樣，但係好小嘅污點，唔好放大件事。

                                                                                                                                          
大方承認曾被富商照顧，令袁詠儀「舒服晒」！