尹佬可以打救莫帥幾多次？

chan200308

尹佩斯終於喺莫耶斯麾下首次「戴帽」，「尹佩斯打救紅魔」、「尹佩斯打救莫耶斯」應該係今日各大體育媒體嘅頭條標題，問題係：尹佬可以打救莫耶斯幾多次？

尹佩斯上個禮拜口口聲聲話喺曼聯過得好快樂，又話想長期留效，但咁多人講過話尹佩斯唔開心，空穴來風唔似個個老作。雖然係咁，莫耶斯應該慶幸費Sir總算留低呢個世界級射手畀佢，今季一幕幕單騎救主貨真價實：季前社區盾，莫耶斯名句「當尹佩斯缺陣，朗尼才被看重」所言非虛，尹佬全場實際上只有兩個唔算好直接，但佢就好直接構成入波嘅機會，第一個係中距離頂彈地波攻破當年被李海強剋死的卡臣，第2球雖然帶啲運氣，但入波就係好波。

首循環鬥阿仙奴，又係靠尹佩斯一箭定江山爆「廠」，當時為莫耶斯攞到唔少分數，難怪佢賽後笑騎騎，整咗句「呢個周末真美妙！」好嘞，嚟到呢場對奧林比亞高斯嘅生死相搏，又係尹佬包辦入球令紅魔起死回生。老實，呢場波踢得好嘅仲有傑斯、迪基亞，但試想如果箭頭唔係尹佬，換第二個斷估入唔到3球。不過，尹佬好波兼滑頭，但身體語言呃唔到人，今場仲見佢有怨隊友嘅舉動。尹佬係咪真係有心留喺來季可能冇得踢歐聯嘅曼聯？係未知之數！而要靠佢場場有咁高水準，長期做救世主，未免不切實際。

一場波係咪可以扭轉紅魔，避免一個頹敗球季？怕且唔易，當記者問莫耶斯，呢場係咪撥亂反正嘅關鍵，莫帥都只敢答句類似希望在人間嘅說話，似乎連佢都信心唔夠。

姑且唔講曼聯呢場後防都有唔少漏洞，只想讚吓老兵傑斯，如果莫耶斯識得間唔中用吓佢，而佢又間唔中做到嘢，都好似唔錯。問題係雙「斯」一個似有離心、一個年屆40，就靠佢哋，救得到莫耶斯嗎？