來迎「造王者」高柏尼！

chan200308

正所謂成也高柏尼，敗也高柏尼，唔通兩隊球隊一藍一紅，都係因為佢而成就首個英超冠軍？

大家一定唔會忘記兩年前曼聯皇國仍然未崩塌，不過卻在最後關頭被曼城追至同分、憑得失球失落英超冠軍。而之後費格遜費爵爺亦講清講楚，如果嗰一年紅魔鬼得到冠軍，佢好可能已經早早金盤洗手。而數返轉頭，其中一場關鍵比賽就係曼市打吡，高柏尼一頭頂走三分，埋下曼聯失落英超嘅伏線，亦成就咗曼城44年來首個英格蘭頂級聯賽錦標、曼城首個英超冠軍。

事隔兩年，英超看來又將會多一隊首奪英超的隊伍，亦係由高柏尼所成就，不過今次唔係曼城，而係利物浦…點解又關高柏尼事？周日的利物浦大戰曼城，如果唔係高柏尼一腳撻Q送個大禮俾古天奴，呢場波隨時和波收場。依家曼城落後7分少賽兩場，冠軍真係隨時雙手交俾紅軍，如果真係成為事實，高柏尼就正式成為兩代「造王者」：送完自己球隊上寶座，兩年後就送人哋隊波上寶座；造完曼城英超得冠，再造紅軍英超得冠。

不過講就係咁講，紅軍仍然有4場比賽未打，仍要對陣狂人帶領的車路士；曼城亦不見得之後4場比賽不能後來居上。然而先決條件，就是球隊必須要自己爭氣，正如強如高柏尼的「造王者」，亦無辦法救今季的曼聯一命；就連當年的「造王者」蘇斯克查，亦要球隊入到歐聯決賽才可以絕殺拜仁。8強就出局，誰也幫不了你。