陶大宇重緣分 心郁回巢打仗

lwl2007

臨危受命的無綫總經理陳志雲，連日來積極度橋助無綫渡過人才流失難關，有指他鎖定多位已離巢的收視王牌，積極游說眾人回巢救亡，包括郭可盈及陶大宇等。看在陳總情面，與無綫不歡而散的大宇亦態度軟化，考慮回巢！

無綫近日因編導人才隨時被「挖空」而頭痕，六嬸方逸華即時出招，勒令總經理陳志雲重掌藝員部，而他亦未敢怠慢，即時向以往有收視保證的藝人埋手，聯絡他們回巢「救火」！陳總向來致力培育有潛質藝人，加上為人隨和，一直深受歡迎，故大批已離巢的重磅藝人亦願意畀面，心郁郁回巢効力，包括曾兩度離開的陶大宇，以及現時專心湊女的郭可盈與林文龍！

曾於97年離巢的陶大宇，09年底再度離開時，與高層為劇集酬勞鬧得極不愉快，但在「陳總效應」下，他仍樂意回巢。身在內地的他昨日接受本報電話訪問時，強調只要傾談合作過程順利，與無綫還是有合作機會：「邊個搵我傾都樂意合作，但要視乎過程，因為我心態唔同以前，好着重對手同角色。我係奄尖嘅人，希望傾合作過程唔好有咁多沙石，之前傾約太多沙石，好唔舒服，令我覺得要暫停合作關係！」

可盈文龍撐無綫

大宇曾與無綫有合約問題，獲無綫賠償10集片酬，但之後當他與無綫再有合作計劃時，對方竟要求他歸還10集片酬，令他大感氣結！他揚言即使再合作，亦有一定堅持：「嗰10集錢我點都唔會嘔番出嚟，呢個係我嘅堅持，亦係我嘅立場，因為根據合約，無綫應該賠畀我。」

對於無綫流失大批台前幕後精英，大宇直指無綫是時候反省：「我一直唔相信有不死神話，今次對無綫係一大考驗！不過，因為好多人始終喺無綫出身，如果做得開心嘅，都想喺呢個大家庭繼續做，只要稍為公平啲，啲人蝕底少少都願意幫無綫。」無綫弄致如斯田地，問他會否心噏，他無奈地說：「我離開過，亦返過去拍幾部劇，心噏已經過咗，對無綫冇晒感覺，若再有緣分，希望返去做番啲開心嘢。」

至於郭可盈前晚出席慈善晚宴時大談湊女經，問到會否回巢拍劇，她笑言現時主力拍廣告，拍劇責任交給老公林文龍。而離巢已久的林文龍，則坦言對無綫仍有感情，並力撐無綫有影響力：「其實唔係咩秘密，無綫都話出價比市價偏低，但佢有好大影響力。」林文龍坦言回巢與否有不少考慮因素：「錢當然係原因，仲有時間同劇本，我依家返內地拍劇比死更難受，BB一日一日咁大，真係唔捨得。」言談間表明想爭取時間留港湊女，看來回巢拍劇機會甚大。

王賢誌踩人工奀

雖然陳總成功吸引收視王牌考慮回巢，但亦有失敗例子，當年因不滿陳總偏心崔建邦而憤然離巢的王賢誌，昨日直踩無綫「一向人工低」，更暗寸無綫簽死藝人冇意思：「我依家同now合作，冇講明唔畀亮相其他電視台，好有彈性。」問到有否與表哥鄭嘉穎談及挖角潮，他說：「佢聽到好多一線藝人話走都冇乜反應，唔知係簽咗長約，定係想攞多次視帝呢？」他相信未來一年電視界有好戲睇，寄語各精英睇定啲。

                                                                                                                                            
曾兩度離巢的陶大宇表示，若無綫斟他歸隊亦樂意考慮，最重要是傾得開心。


                                                                                                              
陶大宇與郭可盈孭飛的《刑事偵緝檔案》，當年收視高企。


                                                                                                              
已約滿無綫的郭可盈與林文龍，對「娘家」百般維護，亦不排除回巢拍劇。