凸肚Kelly扭籮撐黎明

lwl2007

陳慧琳（Kelly）前晚佗住五個月的「小龍包」擔任黎明（Leon）個唱嘉賓時，手舞足蹈踢腿扭籮大唱快歌，全程投入零避忌！而Leon則再度否認老婆樂基兒有孕！

黎明一連七場的個唱於前晚踏入45歲生日中圓滿結束，Leon甫出場即有Fans大叫生日快樂，他叫全場齊唱《孤單的人孤單的我》，期間跳勁舞時更大汗淋漓，笑言自己「流汗不止」！以黑色吊帶裙現身、腳踏約一吋平底鞋的Kelly明顯肚凸凸，她和雷頌德及Leon合唱《紀念日》時手舞足蹈，反而雷頌德及Leon卻表現拘謹，生怕會碰撞到Kelly！而Kelly獻唱《花花宇宙》前笑說：「唱快歌冇問題，我會Un吓Un吓作吓狀！」但見Kelly明顯零「作狀」，全程投入扭腰扭籮外，更不時踢腳，動作多多，一臉輕鬆！

澄清樂基兒冇身孕

期間Kelly盛讚Leon甚具風度，更大爆他拍戲時雖畏高，但仍口震震的照顧自己。雷頌德問Kelly覺得Leon是否「好錫」時，她即指住腹部笑說：「我唔敢講，佗住啲咁嘅嘢！仲敢講！」另外，Leon於騷後表示在個幾月前邀請Kelly任嘉賓，事後才知她懷孕。另外，他又再次澄清太太冇懷孕：「當日係諗住Nice啲答大家，真係唔好意思，我個人太真，反而被人誤會咗！」問到會否追龍B時，他即稱傳媒為父母：「我爸媽都未問我，你哋就代表佢哋不停催生，總之自然發生就會發生，親愛嘅爸爸媽媽，唔好再問我！」


在互動遊戲中提到Leon曾到P場識女仔時「打茄輪」，問到太太會否呷醋時，Leon說：「我只係講事實，工作人員點演繹係新聞自由，總之唔係粗口就得。（太太送生日禮物？）呢個唔係重點，我百分之二百掛住個騷，唔可以分心。」


                                                                                                                                             
肚凸凸的Kelly擔任Leon個唱的表演嘉賓，扭籮唱快歌零避忌！


                                                                                                              
Leon坦言找Kelly做嘉賓後，才知她懷有「龍B」。


                                                                                                              
Kelly與Leon（左）及雷頌德合唱《紀念日》時，手舞足蹈。


                                                                                                              
Leon從天而降出場，Fans大叫生日快樂。