李添勝怒插無綫 周麗淇愁爆

小魔女

無綫節目部連金牌監製李添勝都冇面畀！添哥打算明年退休，無綫即向其作品《我的如意狼君》開刀，監生燉落炮灰檔。如今《我》劇贏口碑輸收視，搞到六十四歲添哥佛都有火，怒轟無綫：「實有人食PK檔，我唔係第二個！」而炮灰女主角周麗淇連Shopping都冇心機！
無綫易主，內亂紛紛，任你是公司有收視保證的老臣子亦一樣冇面畀！曾為無綫立下不少汗馬功勞的金牌監製李添勝，去年躊躇滿志邀周麗淇（Niki）夥拍首次擔正的黃浩然合作劇集《我的如意狼君》，年初節目巡禮亦打算安排該劇在十月黃金檔首播，可惜因為政治因素，《我》劇被燉落聖誕炮灰檔期，由汪明荃主演的《荃加福祿壽探案》頂上。


周麗淇前日到中環睇衫，擔心劇集收視的她最終冇幫襯。
明年退休被冷待因《我》劇劇情夠老土，迎合師奶口味，本周進入結局周，無綫卻安排周日（一月一日）播比較重口味的《天與地》大結局，《我》劇大結局則安排下周一（一月二日）播出，被節目部高層一燉再燉。據知因添哥打算明年退休，有人借勢冷待他，故這位收視爆燈的《巾幗梟雄》監製亦冇例外，《我》劇慘成極品炮灰！
本報致電添哥，提到嘔心瀝血之作變炮灰劇，一向待人接物不慍不火的添哥亦扯火，怒轟無綫：「實有人食PK檔！我以前套《鐵馬尋橋》都食過，係咪用人唯親真係唔知！都嬲唔到咁多，況且我又唔係第一個，都冇話炮唔炮灰囉！」添哥表示，無綫此舉令《我》劇台前幕後意興闌珊，他早已安撫幕後人員。他說：「唔可以講大話，收視真係普通，最慘係口碑好，搞到啲編劇仲唔開心！唉！假期有六、七十萬人離港，如果擺黃金檔起碼高兩點收視啦！不過我都慣喇！」


《我》劇開拍時，台前幕後興奮切燒豬祈求收視創新高。


有指《荃加福祿壽探案》因政治問題，被安排在十月的「靚檔」播映。
讚Niki進步神速添哥更怒氣沖沖踩上節目部質問《我》劇被抽起原因：「我認《我》劇唔係大堆頭粒粒星，孭飛都係Niki同浩然。不過Niki真係進步得好快，浩然又好適合個角色，山聰做得好一早係意料之內。我好畀心機度呢個故事，成件事都有計算，當安排十月檔仲以為一定得。點知畀節目部臨時抽起，話有某啲原因喎，仲同我講對唔住。」
提到退休問題，添哥打算明年底自有決定，他說：「明年年尾滿六十五歲，公司要六十歲退休，做多五年都夠皮啦！我有心無力喇！同事見我行路拐吓拐吓，就知自己體能唔得！」
難控制公司安排添哥為Niki合約問題而延拍《我》劇，Niki一直對該劇寄望甚殷，如今收視麻麻，難怪前日她與朋友到中環Shopping時全黑打扮，滿臉愁容。雖然身邊好友滿載而歸，但她卻兩手fing fing。對於《我》劇成炮灰，飾演徐芯的Niki說：「好難控制公司編排，好開心口碑好囉！但唔知收視點計算。」提到李思捷鬚根look扮徐芯，她笑說：「佢係男人梗有鬚根啦，真係好好笑，唔緊要！」