子丹強攻樂壇新人獎

小魔女

子丹強攻樂壇新人獎
甄子丹演而優則唱，新戲內落力「賣唱」的他，除推出個人MV娛賓外，更不排除月內推出EP，對於被笑指有機會角逐明年樂壇新人獎，子丹坦承：「係都唔拘喎！」
甄子丹於賀歲片《八星抱喜》內化身狂熱Band友，與拍檔吳君如豁出去大放笑彈。繼早前曝光的爆炸頭rock友look後，其新歌MV更選擇於今日亮相「賀歲」。
以為換咗國籍一頭長髮的子丹，抱着結他重唱許冠傑經典金曲《天才與白痴》及《天才白痴夢》，玩味甚重令人相當驚喜，就連其太太汪詩詩亦打趣表示：「冇見過自己老公咁樣！」且笑指驟眼以為子丹換了國籍。


子丹自言與古天樂及陳慧琳拍《八》片，輕鬆又開心。


子丹早前為新片秘密學結他。
一改平日正經feel的子丹，笑言扮嘢扮得相當滿足：「本來老闆黃百鳴搵我做呢個角色，係安排我去踢波嘅，不過我自己對玩音樂信心多番，所以向佢提議改演band友，事前花咗兩個月去苦練結他，啲朋友讚我彈得有板有眼，希望觀眾都鍾意啦。」
據悉，黃百鳴有意趁電影日後推出DVD時，乘勢幫子丹推出個人唱碟，讓他一圓歌星夢，而子丹則謙說：「今次玩票性質，所以冇乜壓力，但真係冇諗過要進軍樂壇，自問未夠班。」
錄歌有新鮮感其實當年子丹仍主力拍電視劇時，已曾唱過劇集主題曲，事隔十多年，今次為拍戲再次走進錄音室，子丹仍大感新鮮：「許冠傑係一個我好欣賞嘅歌手，能夠唱到佢作品，我好開心。（出年角逐樂壇新人獎？）係都唔拘喎，不過最緊要係觀眾睇到我嘅誠意。」