旅客搭巴打的難 街頭巷尾常見慣

東方不敗

的士負面新聞多 好人好事應傳播
    雅廉訪街頭偶遇好友，閒談兩句，突有兩旅客問搭幾路巴士去碼頭，兩人當堂被考起。
    冇搭巴士久矣，最有印象是四號小環市，五號關閘媽閣線，但這些都是二三十年前所知。有問難答，唯有建議搭的士。怎料對方話等了十五分鐘，唔係掛牌就係載客，冇架空的士，企到腳軟也。
    旅客話對澳門印象不差，衰在搭車難。為維護澳門旅遊形象，兩條麻甩佬迫住充當旅遊大使，指美副將馬路多巴士線，到時在站頭問人，可能會搭到。就算冇，亦可打的，蓋因美副將比較多的士經過。
    朋友心地好，佢話就算巴士、的士搭唔到，可由觀音堂直行，廿分鐘可到碼頭。
    見兩旅客仍彷徨，似驚錯過船班，眞想回附近住所開車送客，奈何雙姝係花樣年華陽光少女，正所謂三九唔識七，“無事獻殷勤——非奸即盜”也，而且人家未必相信世上眞有如此好人；再加上畀交警誤會走白牌，惹官非，仲大劑。一閃念下，還是收口。
    不消兩分鐘，竟然又有師奶旅客問搭巴士，同樣死火答唔出，唯有指示其到適當街口等的士。
    近十年八載，巴士從未上過，只間中坐的士，但大多搭得激氣。何解？首先等餐懵，其次一上的士，話唔該去邊，司機多無回應，欠基本禮貌。有些司機又開快車，轉波戳到傻，全無理會乘客感受，若是老人家坐遠些，頂唔順會嘔白泡。
    “樹大有枯枝”，的士拒載時有發生，已見無數次。有司機嬲三乘客分三處落車，或感倒楣，態度轉差，可落車地方亦話唔落得，蓄意兜路發洩，激到乘客扭上警區，司機衰收尾，當日白做矣。
    的士負面新聞多，好人好事卻鮮為人傳揚。有落更司機掛晒停業牌，但見有男子扶步履蹣跚的阿婆去睇病，寧遲交更也載阿婆到診所。乘客付錢時，司機錢箱已鎖，無散銀贖，索性唔收錢。另有乘客上車話去領事館，行一小段路，司機醒起是日假期，乘客只會白走一趟，遂吿之，還載乘客返回原處，當冇車過唔收錢。司機為人設想，如此好心腸，去邊處搵.
    羅倫斯