迪士尼跳爆歌劇院 坐飛氈登長城

山道♂飄移

估唔到有逾 50年歷史的劇院入面，竟然見到正貨米奇同一大班朋友勁跳 Hip Hop同 MoonWalk。仲有阿拉丁、胡迪、巴斯光年同小朋友大玩遊戲，玩到個個企起身狂跳，仲勁過睇 concert！

胡迪、巴斯光年講國語？


■劇服全是人手度身訂做，肥咗都着唔番。

原來迪士尼音樂劇已經唔係第一次在大陸公演。音樂劇總監 MattSantorelli指：「從2004年開始第一套百老匯式音樂劇《小熊維尼》起，到今次已經是第6套音樂劇，07年在內地公演的《米奇明星魔幻秀》更多次重演，相當受歡迎。」全新劇目《米奇音樂嘉年華》，米奇、米妮、唐老鴨、高飛，還有《反斗奇兵》、《阿拉丁》和《小魚仙》等25個角色將同台又唱又跳，由7月起開始中國巡迴之旅。Matt又帶我們直闖後台，除了高飛狗的音樂箱及《小魚仙》中的電鰻外，還看到仿MJ設計的米奇舞衣，原來服裝全是度身訂做，各演員一人只有一套，如有破損得即時修補。茉莉公主、胡迪、巴斯光年等演員還會因應普通話版而積極學國語㖭。


■演員要配合背後電子螢幕的時間走位，每秒都要算到盡。


■大批迪士尼精品要到香港站才推出，價錢都未定，勁新！

勁歌熱舞全場勁 High

一出場，米奇老鼠、米妮已先來一輪勁歌熱舞，連Beyonce的歌也有！阿拉丁出場會示範如何於1分鐘內不停換衫；而睇到男士們流晒鼻血的小魚仙亦大晒芭蕾根底；胡迪同翠絲跳大繩舞，又向觀眾掟大波，搞到個個企起身玩到熱辣辣。唔多似鄧梓峰的巴斯光年仲壓軸射死光，搞到個個 High到一齊跳！個半鐘唔夠？門口買隻迪士尼卡通DVD回家慢慢睇啦。嚟緊 8月 25日至28日《米奇音樂嘉年華》仲會嚟到香港演出，聽公關講門票都賣得七七八八，撲飛請早。


■米奇老鼠着緊件衫咁似 MJ？點解唔跳《 Beat It》呢？


■巴斯光年出場！尖叫聲明顯贏晒！


■逼爆小魚仙一出場，四周男士即時舉機狂影，真係滿足一家大細的需要。


■雖然綠兵係威係勢，但無三眼仔總係略有所失。

迪士尼音樂劇之米奇音樂嘉年華（香港站）
日期： 8月 25日至28日
門票：$500、$400、$300、$200及$100
地點：九龍灣國際展覽中心匯星 Star Hall
查詢： 35833312a.北京展覽館
劇場地址：西直門大街 135號
電話：（ 81） 10-6835 1592

片鴨騷汁四濺

睇完show之後，米奇、米妮同茉莉都餓啦！近近地有紅爆的大董烤鴨店，食客圍住傳統烤爐看師傅烤鴨，師傅還會到你身邊將鴨肉片下，蘸點秘製醬汁，入口肉汁四濺，相當惹味。記得拔絲蘋果要趁熱食，避免黏作一團。每道菜都有分大中小 3個份量，每道菜平均 80元左右，以市中心計，已算便宜。


■大廳中間是開放式烤爐，人人都走埋去影相，你睇師傅個笑容幾牽強。


■記得趁熱食拔絲蘋果，否則糖漿會將蘋果黏住，唔使旨意夾得起。


■招牌大董酥不膩烤鴨，每隻約 248元。


■走型格路線的大董烤鴨店，位同位之間相隔較遠，極受老外歡迎。
                                                
b.大董烤鴨店（金寶匯店）
地址：東城區金寶街 88號金寶匯購物中心 5樓
電話：（ 86） 10-8522 1234

鬼咁大 shopping mall擦肥牛


■未見過咁貪吃的 model。

此時回市中心實塞車，靚女 model Michelle叫我哋往西走，到曾是亞洲最大 shoppingmall的金源新燕莎MALL。佢就好似太古廣場crossover好景商場，國際名牌與雜貨攤共存，令人摸不着頭腦。但商場實在大得驚人，5樓全層設有各國料理餐廳，門口有浮誇的園林佈置同大堆侍應團隊的金源福城肥牛，湯底同牛肉都有幾十款，一般腹肉肥牛雖然未到入口即溶，但脂肪比例平均，入口有油香。Michelle則推薦手工鮮蝦丸，上碟時仍連着蝦尾，味道爽口。


■雜錦拼盤約$40。


■侍應猛推介逾百元一碟的肥牛片，但一般腹肉肥牛味道已經很不錯，$40。

c.金源福城肥牛
地點：海淀區遠大路 1號金源新燕莎 Mall 5樓
電話：（ 86） 10-8887 5288

將藝術食落肚


■酒店正進行「夏季藝術展」，將食同藝術全面融合。

坐飛氈的阿拉丁經過機場，原來最近北京首都機場朗豪酒店，因着其24小時藝術館而推出限定3個月的「藝術套餐」，每道菜都大玩意境，例如做成金魚形狀的蝦餃在菠菜湯中「游泳」，真係唔捨得食落肚；烤西瓜田沙律，將暖山羊芝士及藤茄配Sangria汁，睇落好似有堆紅色西瓜圍住的廣場一樣。而24小時開放的畫廊正舉行的「夏季藝術展」，展出6個藝術家的最新作品，全以戶外環境做題材，更有逾400件油畫、雕塑及裝置藝術作品，睇完覺得自己文藝咗。


■連甜品都做得那麼精緻，真係唔捨得食。


■你話似槌頭鯊定係金魚？

d.藝術套餐（須預訂）5道菜約$1,750，另 15%服務費
北京首都機場朗豪酒店
地址：北京首都國際機場 3號航站樓二經路 1號
電話：（ 86） 10-6457 5555



一般常用的 50元人民幣都是綠色的，另還有一批是 1999年，為慶祝中國建國 50周年而發行的紅色 50元，正面印有毛澤東在天安門城樓閱兵的情況，背面有白鴿、瑞獸等圖案，發行量 6,000萬張，是中國首套流通的紀念鈔，收到記得儲起來。

Travel Memo



持有效回鄉卡均可。中國旅行社： 2853 3533
國泰假期北京 3日 2夜套票，日日出發，可早機去晚機返，入住開業只有2年的北京紫金麗亭酒店，或加錢入住萬豪或盤古七星酒店，及以優惠價延長房間，隨時讓你玩足 7日，套票價 2,399元起。
查詢： 27474388

220V，兩扁腳插座
1元人民幣約兌 1.20港元（文中價錢已折算港元）
下周 21-34℃多雲有雨






■阿拉丁都要專登坐飛氈遊長城，果然有中國特色。

山道♂飄移

北京 Maggie Q掃淘寶　$12變小雲 Look

次次去北京唔係睇故宮天安門，就係去三里屯南鑼鼓巷，你唔厭我都覺得悶。但係如果同你講去京城「淘寶」，仲有北京 Maggie Q教路買衫褲鞋襪，係咪即時醒神晒呢？


■唔好咬脷啦，流鼻血喇喂……


■呢個角度睇，又真係幾似。

劈價一半連身裙


■原本開價$200的裙給劈價劈至$90！

老北京們最愛去北京動物園一帶的批發市場執平貨或「剪牌」名牌貨非常抵。金開利德國際服裝批發市場最紅， 2樓至5樓都是服裝批發，面積約43萬方呎有排行。似行淘寶但勝在有實體！ 3樓以韓國城價錢較其他幾層高 5至 10元，都係 8、90元人仔左右，款式較靚。買完仲可以到4樓即場改衫勁方便！


■逼人高峯期由早上 9點開始，下晝嚟插針都插唔入。


■只要一貼上減價字樣，女士們即蜂擁而上。

e.金開利德國際服裝批發市場
地址：西城區西直門外大街 136號 2至 5樓

雙子塔百變眼鏡妹

咁飾物呢？金開利德後面就係雙子塔世紀天樂服裝批發市場，主樓地庫及1樓主打飾物、帽、皮帶等物品，幾蚊至廿蚊有找好興奮。但係質量參差有時仲有壞，一戴上身店員仲會逼你買，真係買定離手。樓上男裝大部份MK款，超緊身恤衫加貼身皮褲，算罷啦。記住店舖 4點幾拉閘，商場 5點半關門，請當機立斷！


■貓仔耳環約$4.5。


■小鳥項鏈約$14。

f.世紀天樂服裝批發市場
地址：西城區西直門外大街南路 28號

試盡斷碼鞋

東鼎係唯一雜貨選擇，款式不太多但可逐件驗貨。 Michelle買的碎花布藤籃不是藤枝插出來就是有迹，要細心揀。同場還有超 A及外貿鞋佔盡全層，平過秀水市場但就成日斷碼囉。


■愛國就梗係要支持國內消費啦，淘寶人民動起來！


■北京潮興鬆糕鞋，成吋幾兩吋高，標價約$200，講價後約$140。

g.東鼎服裝批發市場
地址：西城區西直門外大街 132號

老外熱捧天皓成

於 07年才落成的天皓成服裝商品批發市場鄰近動物園入口，環境光猛走廊闊，款式較潮又集中，老闆識幾句英文，最叻「 No Bargain」（不議價）。本地人無影，好多外國人來蒲。


■掂完即被大嬸逼買的手袋約$120。


■淘寶大熱款式袋，約$100。



h.天皓成服裝商品批發市場
地點：西城區西直門外大街 137號


■ Michelle小雲上身，戴住副橙色眼鏡四圍跳，嚇到途人彈開晒，眼鏡各約$12。